Mançester Siti dhe Liverpul ofruan një futboll mjaft tërheqës në të fundit takim të javës së 29-të të kampionatit anglez.
Një ndeshje që pati ritmin, luftën sportive, rastet e shumta dhe golat. E përfunduar 1-1, ajo e bëri më të pështjelluar situatën mes skuadrave që synojnë të renditen midis katër vendeve të para, duke përjashtuar kryesuesit e Çelsit, që janë të shkëputur goxha.
Takimi do duhej të kishte patur ndryshim rezultati që në pjesën e parë, diçka që nuk ndodhi, edhe pse rastet nuk munguan. Një 11-metërsh i dhënë për Liverpulin u kthye në gol pak minuta pas nisjes së pjesës së dytë.
Aguero do të bëhej shpëtimtari i vendasve, teksa barazoi në minutën e 69-të. I njëjti lojtar shpërdoroi dhe një sërë rastesh të tjera.
Barazimi ishte rezultati më i drejtë, siç u shpreh dhe Milner, shënuesi i golit të Liverpulit, një ish-lojtar i Mançester Sitit.
Më herët gjatë ditës së sotme, Mançester Junajted fitoi 1-3 në fushën e Midëllsbrout; Totenhemi mposhti gjithashtu 2-1 Sauthemptonin. Fitorja e Mançester Junajtedit e ngjiti atë në vend të pestë, me dy ndeshje ende të paluajtura, ndërsa Arsenali zbriti një vend më poshtë.
Çelsi, Totenhemi, Mançester Siti dhe Liverpuli mbajnë katër pozicionet e para, përkatësisht me 69, 59, 57 dhe 56 pikë; veç Liverpulit, tre ekipet e tjera kanë nga një ndeshje më pak të zhvilluar. /tesheshi.com/
