Njihuni me Janna Jihad, gazetaren më të re në botë

Ndërsa shumica e bashkëmoshatarëve të saj  janë të zënë me lojëra të ndryshme, siç dhe i kërkon mosha, Janna Jihad e rrezikon jetën e saj duke raportuar për konfliktin izraelito-palesinez në zonën e okupuar të Bregut Perëndimor, në përpjekje për të ngritur vetëdijësimin për gjendjen e popullit të saj.

Banore e Nabi Saleh, një fshati të vogël palestinez në veri të qytetit Ramallah, Janna ka qenë dëshmitare e tragjedive të shumë luftërave qysh nga mosha e vogël.

Nëna e Janna-s thotë se ajo është traumatizuar momentin kur një prej shokëve të saj është qëlluar për vdekje nga ushtria izraelite, dhe këtu ajo fillon të shkruajë për ndjenjat dhe frustrimet e saj.

Ndërkaq, me vrasjen edhe të dy kushërinjve të saj, ajo inspirohet që të përfshihet në mënyrë më aktive dhe të vë në pah padrejtësitë të cilat po bëheshin ndaj banorëve të fshatit të saj.

Karriera e saj si gazetare amatore ka filluar qysh kur ka Janna i ka mbushur shtatë vjeç.

Duke përdorur iphone-in e së ëmës, ajo fillon të regjistrojë protestat që organizohen nga aktivistët lokalë dhe ata ndërkombëtarë, si dhe reagimin e ushtrisë izraelite në anën tjetër.

Janna mendon se edhe pse gazetarët profesionistë janë prezent në këto ngjarje, ata nuk raportojnë për çdo gjë; andaj ajo konsideron se është përgjegësi e saj që bota ta shohë fotografinë e plotë të ngjarjeve që ndodhin atje.

Dhe për të bërë këtë, ajo poston video nëpër platformat sociale si YouTube, Facebook apo Snapchat.

“Dëshiroj që e gjithë bota ta dijë se ne nuk jemi terroristë dhe dëshiroj që të vë në pah dhunën e ushtrisë izraelite ndaj nesh’’, thotë ajo.

Faqja e saj në internet ka 80,000 pëlqime.

Nëna e saj thotë se është krenare me të, por shprehet e brengosur për sigurinë e saj.

Xhaxhai i saj po ashtu ndan të njëjtin shqetësim me të ëmën e Janna-s, por thotë se fëmijët palestinezë nuk kanë zgjedhje tjetër.

“Ajo do të duhej të lozë dhe të mësojë, por për jetën që bëjmë ne, kjo nuk është zgjedhje e jona’’, thotë ai për Al Jazeera.

‘’Ne duhet t’i mësojmë fëmijët tanë të mos pranojnë nënçmimin dhe mos të jenë frikacakë. Ne jemi nën okupim. Ne nuk guxojmë t’i mësojmë fëmijat tanë të heshtin, ata duhet të luftojnë për lirinë e tyre”.

Pasi është bërë e famshme në internet në vitin 2014, e njohur nga të gjithë si gazetarja më e re amatore, Janna Jihad ka zgjeruar punën e saj, duke udhëtuar me nënën në vende si Jeruzalem, Hebron, Nablus dhe Jordan për të regjistruar video-raportime dhe për t’i postouar ato në internet.

Janna thotë se ëndrra e saj është të studiojë gazetarinë profesionale në Harvard dhe të punësohet në CNN apo FOX Neës, për shkak se këto media nuk flasin për Palesinën, dhe pikërisht kjo është ajo çfarë dëshiron: të bëjë raportime për Palestinën.

Kur e shikon Janna-n para kamerave duke folur për konfliktin izraelit-palestinez dhe mizoritë që ndodhin në Bregun Perëndimor në baza ditore, është shumë lehtë të harrosh se ajo është vetëm 10-vjeçare.

Megjithatë, ky fëmijë del të lozë herë pas here, kur rrethanat për këtë janë të favorshme.

Në pyetjen se si duket një botë ideale sipas saj, Janna thotë: “Dëshiroj që ajo të jetë pink’’.

Përgatiti: Jeton Zenuni – /tesheshi.com/