Kryeministri Rama, së bashku me ministren e Arsimit, Manastirlliun, me shkak të asaj që ndodhi ne shkolla “Fan Noli”, shkoi e ul me prindër te “Sami Frashëri”. Po pse aty dhe jo atje ku ndodhi tragjedia e vdekjes së një nxënësi nga thika e një nxënënësi tjetër, pra te “Fan Noli”?! asnjë sqarim, vetëm zbërthime të realiteteve të sotme sociale e shoqërore ku rriten fëmijët, si dhe propozime mbi atë që mund të bëjë qeveria për të shmangur dhunën në shkolla.
“Ky problem është shumë përtej policies; nuk është thjeshtë çështje policie dhe mbi të gjitha ky problem është jo vetëm brenda mureve të shtëpisë, që të gjithë ata që kanë fëmijë në një moshë para adoleshencës apo në adoleshencë e dinë shumë mirë se çfarë lloj beteje është me ato mrrokllat, as vetëm brenda mureve të shkollës, por edhe në hapësirën mes të dyjave, në të gjithë ndërveprimet e tjera mes të dyjave dhe s’dua të zgjatem më shumë që t’ju them që vetëm sikur për një moment të imagjinonim që atmosfera e mbingarkuar, me gjuhë të egër, me sjellje të egër, që përcillet përmes kanaleve mediatike të zbutej, të ishte një zbutje e përgjithshme. Por këtë s’është se e kemi shumë në dorë dhe nuk e di se çfarë ilaçi ka”, tha Rama.
Nga ana tjetër, ish-drejtori i Teatrit Kombëtar, aktori Hervin Çuli, prind i një vajze te “Fan Noli”, në klasën ku mësonte dhe viktima Martin Cani, reagon ashpër në rrjete:
“A i takonte ta fillonte te ‘Fan Noli’? A i takonte si burrë shteti ta fillonte aty ky plaga nuk mbyllet dot?! Te ‘Fan Noli’, ku trauma e nxënësve dhe prindërve nuk ka melhem hipokrizie të neveritshme qe ta qetësojë! Apo, varja, rëndësi ka të bëjë sikur po interesohet, rëndësi kanë zgjedhjet, rëndësi ka t’ja hedhë edhe këtë herë!
Anti-Berishizmi nuk justifikon ç’do gjë në rrugen tënde për me mbajt pushtetin. Opozita nuk është Berisha, harroje, opozita ështe pakënaqesia ndaj një gënjeshtari patologjik si ti ne luftën për të mbajt mbretërinë.
Vajza ime e kishte shok klase Martinin. Ajo dhe shokët e Martinit nuk i zë gjumi natën!
Dikur kam bërë një shkrim: ‘Në shesh jo për Ramën, por për veten time’. Erdhi koha që këtë shpullë ta pësosh ti tani!”, shkruan njeriu që disa herë ka ndryshuar qëndrime ndaj Ramës, qyshse ky i fundit u bë aktor politik, në vitet ‘99-‘2000. /tesheshi.com/
