Ai është 12 vjeç dhe quhet Landon Jones. Prej muajit tetor të vitit të shkuar është prekur nga një sëmundje jo e zakontë: nuk ndien më as uri e as etje.
Gjithçka ka nisur pasi ai ka konsumuar një mbrëmje picë dhe akullore. Të nesërmen e asaj dite, djaloshi nuk ndjente më as uri e as dëshirë për të pirë ujë apo lëngje të tjera.
Pas më shumë se një viti, këto ndjesi nuk i janë kthyer më dhe gjëja më e rëndë është se ai ka humbur energjitë dhe vitalitetin e mëparshëm. Mjekët nuk arrijnë të shpjegojnë se çfarë i ka ndodhur, pasi nuk kanë gjetur persona me simptoma të ngjashme.
Hipoteza e mjekëve qëndron në faktin se problemi është i lidhur me një funksionim të keq të hipotalamusit, zonës së trurit, e cila kontrollon, mes të tjerash, ndjesinë e etjes dhe të urisë. Më e çuditshmja është se nëse është me të vërtetë faji i hipotalamusit, duhet të ndikojë edhe në aspekte të tjera të trupit, siç është temperatura apo tensioni i gjakut, të cilat janë në parametra tepër normale në trupin e djaloshit.
Landon ka rënë shumë në peshë dhe janë prindërit ata që duhet ta kujtojnë çdo ditë se organizmi i tij ka nevojë të ushqehet dhe të pijë. Në mënyrë të pashmangshme ai ha më pak, arsye e cila ka bërë që të humbasë më shumë se gjysmën e peshës normale. /tesheshi.com/
