Në kulmin e ngjizjes së një aleance politike PD-Kukës, ku si shkak ishte rebelimi ndaj tarifës së Rrugës së Kombit, një kuksian me emër ka vendosur të çojë në gjyq një demokrat po ashtu me emër.
Presidenti i ekipit të futbollit të Kukësit, Safet Gjici, i akuzuar nga demokrati Ervin Salianji si fitues “marramendës” tenderash nën qeverisjen e majtë, thotë se do hapë gjyq për të provuar të kundërtën.
Me teorinë “shpif, shpif se diçka do mbetet”, Salianji sot doli dhe gënjeu shqiptarët.
I gënjeu, se gjoja unë paskam fituar tendera “marramendës”!!!!
Ervin, je i gabuar!
Që në kohën kur u emërova Prefekt i Qarkut Kukës, në vitin 2014, nuk menaxhoj më asnjë kompani. Kjo dihet botërisht, por ti dhe ata që të nxorën sot nuk dinë apo duan të shohin!
Kjo është e vërteta.
Lidhur me kompanitë e cituara, të sugjeroj të informohesh, pasi fjalët e tua janë të gabuara dhe të siguroj se do të hidhen poshtë dhe nga drejtësia.
Për shpifjen tënde të radhës, që në fakt është e përhershmja përpara çdo beteje elektorale, do të takohemi në Gjykatë, aty ku e vërteta do triumfojë.
Sa i përket tenderave, kompanitë që unë drejtoja dikur, kanë përfitur me konkurim të ndershëm më shumë gjatë qeverisjes së Partisë Demokratike. Kjo është lehtësisht e verifikueshme në buletinet publike. Mjafton ti shohesh!
Për “faktet” që sot paraqite, do shihemi në gjyq, pasi për këtë shpifje të radhës nuk do të ndalem!”, shkruan Gjici.
Ky i fundit ishte dhe kandidat për deputet i PS-së në zgjedhjet e kaluara dhe njihet për të qënit afër pushtetit aktual të të majtëve. /tesheshi.com/
