Spanja, Norvegjia dhe Irlanda e kanë njohur zyrtarisht shtetin palestinez.
Zëdhënësja e qeverisë spanjolle Pilar Alegria tha se u miratua një “vendim i rëndësishëm për njohjen e shtetit palestinez”, i cili ka një qëllim – të ndihmojë izraelitët dhe palestinezët të arrijnë paqen.
Më herët, kryeministri spanjoll Pedro Sanchez vuri në dukje se Spanja do të njihte një shtet palestinez të bazuar në kufijtë e vitit 1967, duke njohur vetëm ndryshimet për të cilat janë rënë dakord nga të dyja palët.
“Edhe pse nuk i takon Spanjës të përcaktojë kufijtë e kombeve të tjera, qëndrimi ynë është në përputhje me rezolutat e Këshillit të Sigurimit të Kombeve të Bashkuara dhe me qëndrimin e mbajtur tradicionalisht nga Bashkimi Evropian”, theksoi lideri spanjoll.
Sanchez shtoi se shteti palestinez duhet të jetë “i qëndrueshëm” me Bregun Perëndimor dhe Gazën të lidhur nga një korridor me Jerusalemin lindor si kryeqytet, raportoi Anadolia.
“Vendimi i sotëm bazohet në të drejtën ndërkombëtare dhe respektimin e rendit të bazuar në rregulla – parimet që na udhëheqin pavarësisht nga konteksti”, tha Sanchez.
Kryeministri spanjoll shtoi se nga e mërkura fokusi i tij do të jetë në avokimin për një zgjidhje të qëndrueshme me dy shtete për të sjellë paqe të qëndrueshme në rajon.
Norvegjia, një nga tre vendet evropiane që njohu zyrtarisht Palestinën sot, përshëndeti “ditën e rëndësishme” dhe shprehu keqardhjen për mungesën e dukshme të “angazhimit konstruktiv” nga Izraeli.
“Për më shumë se 30 vjet, Norvegjia ka qenë një nga mbështetësit më të vendosur të ekzistencës së një shteti palestinez”, tha kreu i diplomacisë norvegjeze, Espen Barth Eide.
“Dita kur Norvegjia njeh zyrtarisht Palestinën si shtet është një ditë e rëndësishme për marrëdhëniet Norvegji-Palestine”, shtoi ai.
Megjithëse deklarata e tre vendeve është kryesisht simbolike, ata shpresojnë të inkurajojnë vendet e tjera të Bashkimit Evropian që të ndjekin shembullin.
Spanja dhe Irlanda do të jenë vendet më të mëdha dhe më me ndikim politik në bllokun 27-anëtarësh që njohin një shtet palestinez, duke u bashkuar me Suedinë, Qipron, Hungarinë, Republikën Çeke, Poloninë, Sllovakinë, Rumaninë dhe Bullgarinë.
Të paktën 140 nga 193 shtetet anëtare të Kombeve të Bashkuara njohin një shtet palestinez, duke përfshirë pjesën më të madhe të Jugut Global, Rusinë, Kinën dhe Indinë.
Britania, Australia dhe Malta, kjo e fundio anëtare e BE-së, kanë lënë të kuptohet në muajt e fundit se mund të ndjekin shembullin e treshes europiane.
Kryeministri slloven Robert Golob tha se qeveria sllovene do të vendosë për njohjen e shtetit palestinez të enjten, pas së cilës vendimi do t’i dërgohet Parlamentit për miratim përfundimtar.
Megjithatë, Franca ka thënë se tani nuk është koha për të njohur shtetësinë palestineze, ndërsa Gjermania i është bashkuar aleatit më të vendosur të Izraelit, Shteteve të Bashkuara, në refuzimin e një qasjeje të njëanshme, duke këmbëngulur se një zgjidhje me dy shtete mund të arrihet vetëm përmes dialogut.
“Njohja e Palestinës është një hap historik që u mundëson palestinezëve dhe izraelitëve të arrijnë paqen”, tha kryeministri Pedro Sanchez. /tesheshi.com/
