Dyshja e senatorëve amerikanë, Chris Murphy dhe Gary Peters, thanë për A2 CNN se pastrimi i politikës shqiptare nga elementët korruptiv është një proces që duhet të ndodhë.
Të pyetur se çfarë mendojnë për faktin që në zgjedhjet e para pak ditëve, dy persona të shpallur “non grata” udhëhoqën fushatën për dy parti, përgjigja ishte: “Është e rëndësishme për t’u siguruar që vendi lufton korrupsionin dhe e largon atë jashtë politikës në Shqipëri. Që të ndërtohet një demokraci e fortë, njerëzit duhet të kenë besim tek sistemi, të besojnë se personat që i përfaqësojnë nuk janë të korruptuar në asnjë mënyrë. Kështu që Shqipëria duhet të vijojë rrugëtimin për ta përmirësuar demokracinë. Demokracia nuk është diçka që e merr dhe e ke…”, tha Peters.
Por për senatorin Murphy, edhe në SHBA ka probleme. “Edhe demokracia jonë ka probleme. Ndaj, një nga arsyet se përse ne jemi këtu, është që të punojmë mbi problemet e përbashkëta, në mënyrë që të ketë më shumë njerëz që votojnë në zgjedhje dhe që ndëshkojnë edhe më shumë këta abuzues kudo mundemi. Këto janë probleme të përbashkëta dhe ne jemi të angazhuar për të gjetur zgjidhje për to”. /tesheshi.com/
