“Të nderuar miq, sapo hymë në qytetn e Vorës, tani sapo dolëm nga qyteti i Vorës”. Kjo anekdodë e sjellë nga guidat turistike të komunizmit dhe që kanë për bazë qytetin më të vogël në Shqipëri, vjen sot kur Bashkimi Europian do t’i mohojë këtë vit hapjen e negociatave Shqipërisë pikërisht nga problemet që janë vënë re në zgjedhjet e 21 qershorit në Vorë, ku LSI-ja e Ilir Metës investoi energji dhe më shumë sesa kaq për ta fituar me çdo kusht.
Në Tiranë ka mbërritur sot kreu i vëzhguesve të misionit të OSBE-ODIHR, Audrey Glover, e cila ka takuar shefin e diplomacisë Ditmir Bushati, por edhe përfaqësuesit e LSI-së. Pikërisht ky takim ka qenë shumë i “çuditshëm” pasi zonja Glover nuk është pritur nga kreu i LSI-së Ilir Meta, por nga nënkryetari Petrit Vasili dhe sekretari i përgjithshëm Luan Rama.
Pas këtij takimi, Vasili dhe Luan Rama dolën para gazetarëve dhe deklaruan se “problemet në zgjedhje nuk duhet të futen më në raport”.
Një deklaratë që thotë shumë. Por siç mësohet, zonja Glover ka ardhur në Tiranë për të bërë ë ditur se ajo do të jetë një nga zyrtarët kyçe që ka hartuar progres raportin e Bashkimit Europian për Shqipërinë. Ky raport që flet për vitin 2014-2015, ka dy probleme të mëdha që mund të cilësohen edhe si ndëshkim: mosarrestimin e zyrtarëve të korruptuar dhe problem në zgjedhjet vendore të 21 qershorit, ku Vora është kryefjala.
Sipas raportit në zgjedhjet e Vorës është investuar në mjete jashtëelektorale dhe jashtëpolitike për të ndikuar në rezultat. Dhe siç mësohet ky raport nuk ka ardhur si “rrufe në qiell të pastër”, por ka pasur si bazë raportimin e gjerë dhe intensiv të diplomatëve të Perëndimit në Tiranë, të cilët kanë qenë mjaft aktivë ditën e zgjedhjeve në bashkinë Vorë, por edhe në Durrës apo dhe Kavajë, ku opozita ka lëshuar alarmin.
Siç mësohet nga burime diplomatike pranë Bashkimit Europian, thelbi i raportit do të jetë ajo që cilësohet “ndikimi i pushtetit politik në mendimin e votuesve”, apo siç cilësohet në gjuhën e përditshme si blerja e zgjedheve.
Komisioni Europian pritet të publikojë progres-raportin në fund të tetorit ndërkohë që do të duhej ta bëntë publike ditën e sotme.
Gjithçka është bërë ngaqë aktualisht situata është e fokusuar tek refugjatët dhe nëse do të publikohej tani nuk do të merrte vëmendjen e duhur. Megjithatë gjithçka është bërë gati dhe është miratuar nga të gjithë aktorët politikë dhe shtetet anëtare. I vetmi formalitet është miratimi i Ministrave të Jashtëm dhe Krerëve të shtetit të vendeve anëtare të BE-së.
Por ç`ndodhi në Vorë në fushatën e 21 qershorit?
LSI angazhoi një makineri të madhe shtetërore dhe administrate, për të ndikuar në votën finale. Ambasada e BE-së në Tiranë mësohet se ka marrë dëshmi nga pjesëtarë të administratës që theksojnë se kanë marrë urdhëra nga zyrtarë të Inspektoratit të Mjedisit dhe Ujësjellësit të Tiranës për të votuar pro kandidatit të LSI-së. Siç mësohet. në raport janë shënuar punësimet që LSI-ja ka ndikuar të kryhen në Ujësjellësin e Tiranës, që drejtohet megjithatë nga një eksponent i afërt me PD-në. Fraza më e fortë në raport është ajo e “grupimit dhe investimit të makinerisë shtetërore për të ndikuar në rezultat pa u votuar”. /tesheshi.com/
