“Spoti i ri i Bardhazi. Kush i mban mend spotet tona, e di që ne gjithmonë provokojmë si askush”, shkruan moderatori Erion Kristo, në postimin e një spoti të ri ku provokimi është dhe blasfemi. Ai shfaqet në Katedralen katolike të Tiranës, brenda ambienteve të saj, duke biseduar me priftin e njohur Gjergj Meta, në një lloj dialogu që më pas rrëshqet dhe në blasfemi. Kolegia e Kristos, Ornela, deklamon se “në këtë vend edhe Zoti është bërë për t’u rrëfyer(!!!). Pos një tragjedizimi të tepruar të vendit tij, i cili bashkë me të këqijat ka dhe shumë të mira, si kudo, vjen dhe kjo shaka pa kripë, ku ajo që të dhemb në këtë rast është dhe tolerimi që u ka bërë prifti Gjergj Meta. Ky i fundit nuk duhej ta kishte lejuar atë lloj libreti nga ana e dyshes moderatore. Me etikën dhe forcën e arsyes që e karakterizon, duhej t’i kishte këshilluar që kinse humorin e tyre cinik të mos e çonin deri në blafsemi.
Provokimet, siç shkruan Kristo, nuk duhet të jenë qëllim në vetëvete, pasi Charlie Hebdo nuk është një shembull i mirë për t’u ndjekur. Ai është një turp në gazetari dhe një gazetari e mirë jo domosdo vjen nga tendencat për provokim. /tesheshi.com/
