Nga Ermir Hoxha
Ndërkohë që Serbia ka pasur shpesh aleate të saj Francën në Europë, në vitin 1999, falë aferës së ‘Telekom Serbia’, Lamberto Dini, ish-ministri i saj i Jashtëm doli në dritë si aleati i fshehtë i Beogradit.
Ndërsa sot pas 15 vjetësh, Italia nuk e ka këtë sjellje më ndaj Shqipërisë dhe Kosovës. Madje kuqezinjtë kanë një trainer italian që ka marrë edhe pasaportë shqiptare.
Siç u mësua pak orë më parë, UEFA ka emëruar një italian 44-vjeçar që të drejtojë betejën ballkanike mes dy kombeve të mëdhenj të rajonit në ‘Elbasan Arena’ më 8 tetor.
Nicola Rizzoli, aktitekt me profesion dhe pjesëtar i një familjeje shumë të famshme në vendin e tij (familja Rizzoli kanë shtëpinë botuese më të rëndësishme në vend dhe gazetën prestigjoze Corriere Della Sera), është aktualisht gjyqtari më i mirë në Itali dhe një nga më të mirët në Europë.
Sa për statistikë, Rizzoli drejtoi finale e Botërorit të Brazilit dy vjet më parë ndërmjet Gjermanisë dhe Argjentinës. Ndërkohë ka drejtuar në kontinent ndeshje të mëdha si Barcelona- Bayern Munchen apo Chelsea-Atletico Madrid në pjesën finale të Champions League.
Deri tani asnjë ndeshje nuk i ka dalë me probleme dhe asnjë situatë s’i ka shpëtuar nga duart. Dhe shpresojmë për që këtë traditë pozitive në karrierë ta vijojë dhe në “përballjen e shekullit” në kuptimin ballkanik të fjalës.
Më 7 maj të këtij viti, Rizzoli nxori librin e tij “Shija që të jep puna e arbitrit”, natyrisht e botuar nga ‘Rizzoli’. Ai tregon përvojën e një gjyqtari futbolli duke u nisur nga Finalja e Botërorit e duke sjellë përvojën e tij të gjatë në fushat e blerta.
Michel Platini e ka emëruar Rizzolin për të drejtuar “pataten e nxehtë” Shqipëri-Serbi, duke qenë se njihet për qetësinë e tij për të menaxhuar situata të nxehta. Kjo pasi kolegu i tij, anglezi Martin Atkinson, edhe pse mund të shquhej për qetësi nuk arriti dot të mbajë nervat nën një situatë absurde në stadiumin ‘Partizani’ të Beogradit.
/tesheshi.com/
