Dy menaxherë të Air France u detyruan të largohen nga një mbledhje e bordit që do të merrte në shqyrtim shkurtimin e 2900 vendeve të punës, pasi turma e punonjësve të zemëruar hyri me forcë në takim.
Kompania pritet të ndërmarrë veprime ligjore ndaj personave që hynë me forcë dhe u shqyen rrobat menaxherëve, mirëpo fotot e këtyre të fundit ndërsa largoheshin me nxitim në gjendje të mjerueshme, duke kapërcyer një gardh, kanë bërë xhiron e rrjeteve sociale.
Masat që pritet të merren janë shkurtimi i vendeve të punës me 10 për qind dhe një pensionim i parakohshëm i disa avionëve që do ta reduktojë flotën ajrore deri në vitin 2017.
Menaxheri i burimeve njerëzore, Xavier Broseta, dhe drejtori i Air France për aeroportin e Orly-t u bllokuan mes turmës së punonjësve të zemëruar dhe u katandisën në një gjendje qesharake, me rroba të grisura. /tesheshi.com/
