Kosova pritet të shkojë të dielën në votime, në një proces të parakohshëm ardhur nga rënia e qeverisë Mustafa si pasojë e një mocioni mosbesimi, prej ku do të dalë parlamenti i ri dhe qeveria e re.
Por sipas treguesve, rënia e numrit të zgjedhësve ka ardhur në rënie proces pas procesi.
Kështu, në zgjedhjet qendrore të mbajtura më 17 nëntor 2007, ku ishin mbajtur edhe ato lokale përnjëherë, në votime dolën 54 për qind. Në vitin 2007, numri i votuesve ishte 1 milionë e 454 mijë e 174 votues. Ndërsa numri total i qytetarëve të cilët kanë dalë në zgjedhje, ka qenë 628 mijë e 630 veta.
Pas tri viteve, në zgjedhjet e jashtëzakonshme të 12 dhjetorit po ashtu numri i votuesve ka rënë. Pjesëmarrja në votime ishte 45.29 për qind. Duhet theksuar se numri i votuesve të regjistruar ishte më i madh se sa ai i vitit 2007, gjithsejtë 1 milionë e 632 mijë e 276 votues. Ndërsa, numri i votuesve që kanë dalë në secilin vendvotim në zgjedhjet e vitit 2010, ishte 706 mijë e 317 votues.
Edhe pse në zgjedhjet e vitit 2014, ishte rritur numri i votuesve të regjistruar, e po ashtu edhe i atyre që kanë votuar në secilin vendvotim, përqindja e daljes së qytetarëve në zgjedhje përsëri kishte pësuar rënie, nga ato të vitit 2007 dhe 2010.
Në zgjedhjet e 8 qershorit 2014, pjesëmarrja në votime ishte 42.63 për qind.
Për këto zgjedhje, numri i votuesve të regjistruar ishte 1 milion e 799 mijë e 23 votues, ndërsa, numri i votuesve që kanë votuar në secilin vendvotim ishte 734 mijë e 055 votues.
Shkak për të këtë rënie mendohet të ketë zhgënjimi i votuesve nga politika. Siç u pa dhe në 10 ditë fushatë, partitë u zhytën në premtime jashtë çdo sensi mase e logjike. Kryesonte ndër to ai i Ramushit, kandidat për kryeministër, që tha se do i liberalizonte vizat për tre muaj. Por ndërkohë ai përbetohet se nuk do e lejojë ratifikimin e demarkacionit, që është dhe kushti kryesor i Uashingtonit dhe Brukselit për heqjen e vizave. /tesheshi.com/
