Kreu i PD-së, Lulzim Basha ka premtuar bujshëm gjatë një tubimi elektoral në Peshkopi se Rrugën e Arbërit do jua çojë të pëfunduar brenda dy viteve.
“Ju jap fjalën se brenda janarit të ardhshëm kantieri i rrugës së Arbrit në të gjithë gjatësinë e tij do të jetë në funksion të plotë dhe brenda dy viteve tuneli dhe rruga e Abrërit do të jetë një realitet ku do të qarkullojnë makinat e dibranëve dhe gjithë shqiptarëve. 72 minuta nga Bllata në Sheshin Skënderbej”, tha Basha, duke i “prekur n’tela” dibranët e pritjes së gjatë për rrugën që do i nxirrte nga izolimi.
Risia tjetër e Bashës në qytetin verilindor, ishte futja në thesin e LSI-së dhe e PDIU-së, partisë çame që ka krijuar së fundi një peshë elektorale në Dibër, edhe pse aty nuk ka patur e nuk ka ndonjë komunitet çam.
“Hidheni dhe atë në Drin”, tha Basha, duke mos e kursyer si gjithnjë Ilir Metën.
“Eshtë bërë bishë Ilir Meta. Pse u bë bishë? Sepse e shikonte veten një dorë në bakllava, një dorë në sheqerpare. Por mesa shoh dorën në bakllava nuk ka për ta pasur kurrë më, por edhe këta të sheqerpares kanë ndërmend t’ia heqin dorën. Edhe këta të PDIU që janë future me kokë në qypin e turishive, më mirë hidhini në Drin votat sesa t’ja jepni këtyre”, theksoi kreu demokrat. /tesheshi.com/
