Lideri i opozitës maqedonase, Zoran Zaev ka paralajmëruar se do të vazhdojë edhe sot me publikimin e audio-incizimeve të bisedave të përgjuara për skandalet e qeverisë Gruevski.
Zaev ka deklaruar se publikimet nuk do të ndalen për shkak të bisedimeve për zgjidhjen e krizës që vazhdojnë të mërkurën në Bruksel, por do të jenë të përzgjedhura në mënyrë që të mos kërcënojnë procesin negociator.
“Do të kemi kujdes në sensibilitetin e materialeve të publikuara. Nuk do lejojmë që të akuzohemi se kërcënojmë procesin negociator, pasi nuk e dëshirojmë një gjë të tillë.
Patjetër duhet të vazhdojë zbardhja e së vërtetës për keqpërdorimet që ka bërë pushteti”, tha Zaev.
Përgjimet e reja kanë të bëjnë me manipulimet nga organizatat joqeveritare, për Federatën e Futbollit të Maqedonisë, për ndërhyrjet në rektoratet e universiteteve etj.
Zaev tha se “bombat” më të ndjeshme, si rasti i “Monstrës” nuk do të publikohen gjatë kohës së negociatave, dhe as para protestës së 13 qershorit që e organizon Lëvizja BESA. /tesheshi.com/
