Nuk ishte parë gjer më sot por ja që ndodhi. Një protestë është organizuar në përkrahje të një shtëpie të njohur botuese, Logos –A, e cila po kërcënohet së fundi nga pushteti pas një sërë kontrollesh qeveritare të befasishme.
Protesta u organizuar nga Lidhja e Nxënësve Shqiptarë, e përkrahur nga qindra qytetarë dhe aktivistë të shoqërisë civile.
E gjitha nisi kur u aludua se Logosi ka mbështetur Lëvizjen BESA. Detaj interesant i protestës ka qenë lutja e organizatorëve për të marrë secili me vete një libër të botuar nga ky ent botues.
Protesta përmbajti fjalime të ndryshme të nxënësve, ekspozitë me fotografi mbi të arriturat e kësaj shtëpie botuese gjatë 25 viteve të kaluara etj.
Lidhur me këtë protestë, për tesheshi.com ka folur vet kryetari i Lidhjes së Nxënësve Shqiptarë në Maqedoni, Amar Rexhepi. Sipas tij protesta në fjalë u organizua në mbështetje të shtëpisë botuese Logos-A me qëllim dëshmimin e vlerës së kësaj çerdhe të dijes, ku ka qenë dhe do të mbetet pjesë e pandashme e jetës bashkëkohore të çdo nxënësi dhe studenti në të gjitha trojet shqiptare.
“Nuk është lehtë të jetosh në një shtet, ku injoranca llogaritet sukses ndërsa dituria dhe libri llogariten luks, posaqërisht kur dihet edhe fakti që libri shqip dhe fjala e shkruar shqipe luftohen nga pushteti sikur të ishin armiqë shtetëror e jo vlerë bashkëkohore. Një sfidë e këtillë e ka kapluar Shtëpinë më të madhe botuese shqiptare, “Logos-A”, duke u bë cak i sulmeve kriminele nga pushteti i korruptuar. Prandaj, në shenjë proteste ndaj veprimeve joligjore dhe kriminele të pushtetit si dhe në shenjë përkrahjeje të punës dhe veprimtarisë kombëtare dhe arsimore të Sh.B.”Logos-A”, Lidhja e Nxënësve Shqiptar organizoi këtë protestë që të dëshmojë se “Logos-A” dhe librat e shumtë të saj, janë dhe do të mbeten pjesë e pandashme e jetës bashkëkohore të çdo nxënësi dhe studenti në të gjitha trojet shqiptare. Të mbrojmë këtë çerdhe të dijes”, deklaroi për tesheshi, kreu i LNSH-së, Amar Rexhepi.
Ndaj sulmeve të pushtetit mbi shtëpinë botuese Logos-A kanë reaguar thuajse të gjithë personalitetet më me peshë nga gjitha trojet shqiptare. M. Krasniqi – /tesheshi.com/
