Fushata elektorale në Kosovë, në fundin e saj, ka shënuar një rast gati të pabesueshëm, nëse nuk shihet vetë me sy e të konfirmohet nga njeriu kryesor që ka qenë aty: takim elektoral brenda një xhamie. Ndryshe do ishte marrë për sajesë me Inteligjencë Artificiale.
Dhe është ndryshe nëse është fjala për ndonjë kandidat që hyn në xhami, sigurisht duke zbathur këpucët dhe takohet me hoxhën e atyshëm apo besimtarë e bisedon me ta “për hallet e vendit”. Jo, është fjala për një takim klasik politik, nga ato ku ambientet mund të merren dhe me qera. Kjo nuk do të thotë se xhamia është marrë me qera. Gjithsesi, detaje të tjera nuk dihen se si ka ndodhur që VV-ja të mund të realizojë takim elektoral brenda në xhami.
Njeriu kryesor aty ka qenë ministri i Mbrojtjes Ejup Maqedonci. Madje është ky i fundit që shkruan mbi këtë takim, pa e theksuar faktin se ku është mbajtur, pra në xhami.
“Në fshatin Majac, emri i të cilit vendbanim rrjedh nga fjale ilire-shqipe mal, vërtetë zemra mu bë mal nga mikpritja e banorëve të këtij fshati të cilët konfirmuan përkrahjen e Lëvizjes VETËVENDOSJE!”, shkruan Maqedonci.
Ky rast i paprecedent rëndohet dhe nga fakti se të tubuarit në xhami janë të gjithë me këpucë mbi tapet. Pra, as që e kanë respektuar shenjtërinë e vendit ku kanë hyrë, veç faktit se kanë mbuluar me plastmas mimberin, vendin nga ku hoxha mban hutben e xhumasë. /tesheshi.com/
