Duke lënë të pagojë dhe vetë ndërkombëtarët e Vettingut, si një njeri që posedonte një banesë modeste prej 70 metra katror në 25 vite punë në drejtësi, edhe si prokuror me peshë, Altin Dumani, kreu i SPAK-ut, pa asnjë hije mbi moralin e tij individual e profesional, po tentohet të bëhet pis nga Berishajt. Është Argita Malltezi, e cila, duke ndjekur të njëjtën traditë të mbrapshtë të të atit, ku çdo kundërshtar apo çdokush që nuk është në linjë me ta i duhet gjetur apo sajuar një njollë, ka aluduar se Dumani është i kapur për shkak të një shtëpie, dhuruar atij nga Kisha(!!!).
“Dumani nuk ka dalë kurrë të përgënjeshtrojë faktin që ka marrë një apartament nga Kisha, gjë për të cilët të tjerët për shumë më pak kanë ikur nga sistemi i drejtësisë”, tha Malltezi në një intervistë televizive, për ironi, në të njëjtën ditë që media do nxirrte një deklaratë televizive të Berishës në 2017-ën, teksa fliste me superlativa për Altin Dumanin, si njeri me integritet të lartë moral.
Znj. Malltezi, përballë një gazetarie të dobët që nuk ka aftësinë ta vërë në pozitë për akuza të tilla, është treguar fotokopje e të atit të raste të tilla, ku mjafton të hedhë një akuzë, pa dhënë asnjë fakt të mëtejshëm për atë që thotë.
Fjala vjen, pse Kisha na i paska dhënë një apartament Altin Dumanit?! Kur ka ndodhur dhe pse? Ku është ky apartament?! Nëse ka ndodhur vërtet, cili është korruptimi në këtë rast i Dumanit, pasi Kisha ia ka dhënë e jo politika?!
Dumani s’po heton jetën fetare, por segmente të politikës të zhytur në krim e korrupsion. /tesheshi.com/
