Edhe kreu i shtetit, Bujar Nishani, është përfshirë në debatin mbi përgjimet e supozuara të policisë shqiptare mbi një arradhë politikënash dhe zyrtarësh të larë të shtetit, madje dhe ambasadorë e njerëz të medias, sipas një liste të publikuar nga ish-kryeministri Berisha.
“Sot funksionon një pajisje përgjimi ilegale dhe kjo është antikushtetuese. I bëj thirrje prokurorisë që të mbrojë dinjitetin e shtetit dhe sigurinë. I bëj thirrje që të hetojë se cili autoritet doganor lejoi hyrjen e kësaj pajisjeje në Shqipëri”, ka deklaruar Nishani, duke konsideruar fakt të kryer atë për të cilën deri më tani nuk ka asnjë provë zyrtare për ta vërtetuar, ndërkohë që si president, i takon të jetë më institucional se sa politik në të tilla raste.
Por Nishani ka paralajmëruar ndërkohë hapjen e një tjetër fronti beteje me mazhorancën, atë mbi procesin e hapjes së dosjeve për të cilin qeveria ka përgatitur një ligj që t’i paraprijë proçesit. “Nuk do të lejoj aplikimin e një ligji të cunguar të hapjes së dosjeve”, ka thënë kreu i shtetit shqiptar gjatë një takimi me të përndjekur politikë, pikërisht aty ku u shpreh dhe mbi përgjimet e supozuara të policisë. /tesheshi.com/
