Një nga kritikët kryesorë të Kremlinit, Alexei Navalny, ka mbërritur në një pjesë të Rusisë 200 kilometra në lindje të Moskës, një koloni penale ku ai u transferua për të vuajtur dënimin e tij, njoftoi Komisioni Publik i Mbikëqyrjes së Moskës (ONK).
“Navalny ka mbërritur në një burg të Rusisë në rajonin Vladimir ku do të vuajë dënimin e tij,” tha ONK në një deklaratë.
Kryesekretari i komisionit, Alexei Melnikov, i tha Interfax se Navalny, i cili u dënua me dy vjet e gjysmë burg, së pari do të ishte në karantinë për disa kohë dhe më pas do të transferohej në një nga kolonitë në rajon.
Sipas burimeve të kontaktuar nga gazetarët nga agjencitë TASS dhe Ria Novosti, Navalny së shpejti do të transferohet në koloninë penale Nr. 2, e vendosur në qytetin e Pokrov, në rajonin Vladimir në pjesën Evropiane të Rusisë.
Sipas mediave ruse, “rregullat e zakonshme” zbatohen në këtë lloj kolonie, që do të thotë se kushtet e burgut janë disi më pak të rënda se në pavijonet e tjera, dhe se rreth 800 të burgosur vuajnë dënimin atje.
Të premten, shefi i burgut rus Aleksandër Kalashnikov siguroi gazetarët se Navalny ishte “zhvendosur atje ku duhej të ishte në përputhje me vendimin e gjykatës” dhe se një nga politikanët kryesorë të opozitës së vendit “nuk ishte në rrezik për jetën ose shëndetin”.
“Navalny do të vuajë dënimin e tij në kushte absolutisht normale,” tha Kalashnikov, duke shtuar se i burgosuri, nëse dëshironte, do të merrte pjesë në disa aktivitete në objektet e prodhimit.
Javën e kaluar, gjyqësori rus konfirmoi dënimin e aktivistit rus 44-vjeçar për shkak të një rasti mashtrimi nga 2014, të cilin ai, si dhe shumë vende perëndimore dhe organizata joqeveritare, i konsiderojnë politike. /tesheshi.com/
