Për pije të ndryshme që kanë çmime tepër të larta kemi dëgjuar shumë, e përgjithësisht bëhet fjalë për pije alkoolike siç mund të jenë verat luksoze apo pije të tjera, për të cilat nevojitet një kohë shumë e gjatë fermentimi dhe përpunimi. Mirëpo, me sa duket, asnjëra prej tyre nuk arrin të ketë vlerën e këtij çaji të rrallë.
Emri i tij është Da Hong Pao dhe një filxhan i kësaj pije mund të kushtojë mbi 10 mijë dollarë. Nëse bëjmë një llogari të thjeshtë i bie që një gram i vetëm i këtij çaji të kushtojë rreth 1400 dollarë, pra thuajse 30 herë më shtrenjtë sa e njëjta sasi ari.
Arsyeja e këtij çmimi kaq të lartë është për shkak të rrallësisë së fletëve të përdorura në bërjen e çajit. Bëhet fjalë për një varietet antik çaji, i cili rritet vetëm në malet e egra Wuyi në provincën Fujian.
Edhe mënyra e përpunimit është shumë komplekse. Çdo fletë lahet me qumësht dhie për një periudhë të caktuar kohe, më pas pritet dhe lihet të thahet për periudha shumë të gjata kohore. Duket se pija e çmuar ka edhe veti kuruese thuajse mrekullibërëse. /tesheshi.com/
