Nga Mensur Krasniqi
Në shkrimin e fundit për uljen e investimeve të huaja në Maqedoni, portali tesheshi.com ka bërë të ditur se shumë kompani të mëdha ndërkombëtare kanë braktisur bizneset e tyre nga territori i Maqedonisë.
E gjithë kjo, sipas ekspertëve nga sfera e ekonomisë, kryesisht ka ndodhur si pasojë e krizës politike në vend. Dëshmi tjetër për këtë rënie të investimeve të huaja është edhe ajo që gjatë ditës së sotme kompania e zonës industriale në Shkup, Genterm ka shkarkuar nga puna 300 punëtorë. Atyre nuk iu është vazhduar kontrata e punës. Arsyetimi i drejtuesve të kompanisë ka qenë se prej fillimit të viit 2016 nuk do të ju duhen këto punëtorë.
Këta të fundit, të cilëve nuk ju është vazhduar kontrata, ndjehen të zhgënjyer dhe të përdorur. Para 20 ditëve në këtë fabrikë ishte edhe kryeministri Gruevski bashkë me udhëheqësin e zonës industriale ku gjendet Genterm, Viktor Mizo, dhe që të dy dhanë deklarata të ndryshme se kur do të fillojë me prodhimin kjo fabrikë.
Shkarkimi nga puna e 300 punëtorëve nga kjo fabrikë, në një moment kur njëkohësisht është paralajmëruar fillimi i punës intensive dhe hapja e vendeve të reja të punës, është shumë kontradiktore dhe e pakuptueshme.
Genterm është kompani shumëkombëshe, me rritje të shpejtë e cila prodhon elektropajisje për rregullim të energjisë termike nëpër automobilë. Numëron gjithsej 9.000 të punësuar në kapacitetet në SHBA dhe Ukrainë, ndërsa në vit nga shitja realizon 800 milionë dollarë. /tesheshi.com/
