(Mos)ndëshkimi i pabesueshëm policor për këtë xhirues gomash

Ngjan e pabesueshme ajo që njofton Policia e Shtetit mbi ndëshkimin e një personi që xhiron gomat krejt sfidueshëm ditën për diell, nën hundën e saj, në një prej zonave më të njohura të Tiranës, përballë korpusit universitar, pra me presidencën e qeverinë dy hapa larg.

Policia ofron pamjet e Mercedezit ku njeriu në timonin e saj përcjell qartë atë se çfarë është: dikush që në dehje mund të marrë lehtësisht dhe jetë njerëzish dhe, e para që të shkon në mëndje është një ndëshkim shembullor ndaj tij duke ia marrë mjetin(bllokim) e mos lënë më të hipë në timon për të paktën një vit(heqje patente). Por asnjë nga këto. Policia ka vendosur ta gjobisë me 60 mijë lekë(pra 600 mijë).

“Policia Rrugore e Tiranës ka evidentuar nëpërmjet pamjeve filmike, ka shoqëruar dhe ka ndëshkuar me masë administrative 60 000 lekë, drejtuesin e mjetit, për shkelje të nenit 139/3 të Kodit Rrugor, për rregullimin e shpejtësisë në qendra të banuara.

Kujdes! Drifting në qendra të banuara ndalohet nga Kodi Rrugor!

Respekto rregullat e qarkullimit rrugor, shpëto jetë!”, thuhet në njoftimin zyrtar.

Pyetja është: Çfarë mund t’i ketë sjellë ajo gjobë atij lloj njeriu, më saktë i riu, i cili gjersa luan me një makinë të tillë s’i ka asgjë 600 mijë lekë. Madje mund të jetë bërë vetë gati që t’i paguajë me qejf.

Para se të shkonte të ndëshkimi me gjobë, Policia duhej ta hetonte atë të ri se me çfarë jeton, me çfarë e ka blerë atë automjet, ku dhe si e fiton jetën. Dhe kjo duhet të ndodhë edhe pa xhiruar goma. Mjaft që Policia të shohë një makinmë luksoze ku mosha e atij në timon nuk korrespondon me vlerën e makinës për ta ndaluar dhe hetuar, aty në çast. /tesheshi.com/