Nga Blendi Gashi
Koaliconi PDK-AAK-NISMA, në mungesë të numrave për të zgjedhur Kryetarin e Kuvendit, post ky që u takon atyre, tashmë kanë dalë me kërkesa të reja, që janë mbajtja e një takimi konsultativ mes partive ditën e mërkurë të javës së ardhshme ku do të vendoset për vazhdimin e seancës si dhe votimi në një paketë të Kryeparlamentarit dhe Qeverisë.
Këto kërkesa PAN i paraqiti sot përmes përfaqësuesve të saj në Kryesinë e Kuvendit, Enver Hoxhaj, Pal Lekaj dhe Bilal Sherifi.
Por ato janë refuzuar nga Vetëvendosje, LDK e aleatët, duke thënë se nuk kanë arsye të takohen me partitë e PAN-it, pasi sipas tyre qëllim është të bëjnë votat për zgjedhjen e Kadri Veselit për kryekuvendar e jo të vazhdohet me punë.
Shefi i Grupit Parlamentar të LDK-së, Avdullah Hoti, pas mbledhjes së Kryesisë tha se kërkesa e PAN-it, që në pako të votohen qeveria dhe kryeparlamentari nuk ka logjikë.
Ndërsa Glauk Konjufca, shefi i grupit parlamentar të Vetëvendosje-s, e ka quajtur qesharake kërkesën e PAN-it që VV e LDK të votojnë Ramushin kryeministër, duke shtuar se kërkesat e tyre bëhen sa për të ruajtur unitetin mes bllokut të tyre pasi kanë një marrëveshje parazgjedhore.
“Ata janë marr vesh që Veseli të zgjidhet kryetar i Kuvendit e si rrjedhojë Haradinaj kryeministër. Nëse Veseli nuk zgjidhet kryetar atëherë do të kemi prishje të llogarive që kanë bërë”, tha Konjufca.
Ja ç’thonë analistët për krizën e re politike
Edhe analistët politikë bojkotin e punimeve të Kuvendit nga koalicioni fitues e shohin kryekëput si lojë të Kadri Veselit që ky i fundit të arrijë qëllimet e tij personale.
Politologu Mentor Tahiri, mendon se stërzgjatja e konstituimit të Kuvendit vjen si rezultat i mungesës së votave, dhe ka për synim përfitimin e më shumë kohe shtesë që eventualisht të sigurohet ndonjë deputet më tepër që do të përkrahte kandidaturën e propozuar nga PAN për kryekuvendar.
“Mbajtja e zgjedhjeve të reja të parakohshme, gjithnjë e më shumë po duket si një opsion real. Por është pikëpyetje nëse diçka e tillë i konvenon subjekteve të radhitura në kuadër të PAN. Zgjedhjet e 11 qershorit me rezultatin që prodhuan, tregojnë qartë se ekziston një trend në rritje i pakënaqësisë me garniturën politike të pasluftës”, thotë Tahiri për tesheshi.com.
Faik Krasniqi, njohës i rrethanave politike thotë se zhvillimet e fundit në Kuvend janë lojëra të Kadri Veselit dhe Klanit “Pronto” të cilët po shihet se nuk i kanë numrat e nevojshëm për zgjedhjen e kryeparlamentarit dhe as formimin e qeverisë, përkundër deklarimeve që i kanë numrat e nevojshëm dhe krijimi i institucioneve do të ndodh në afat rekord.
Krasniqi e quan qesharak dhe jo të sinqertë kushtin e Veselit për VV-në, që do të tërhiqej nga kandidatura e kryekuvendarit, në rast se këta të fundit votojnë Haradinajn kryeministër.
“Kushti tjetër absurd dhe qesharak është edhe deklarimi se ata të marrin pjesë në seancën konstituive vetëm atëherë kur të arrihet një konsensus mes partive politike. Askund në botë nuk ndodh që koalicioni që ka dalë fitues i zgjedhjeve të vendosë kushte për të marrë pjesë në seancë. Konsideroj që e gjitha kjo është një lojë e Kadri Veselit, që ta çojë vendin prapë në zgjedhje dhe të tentojë që të bëhet kryeministër”, thotë Krasniqi për tesheshi.com.
Edhe analisti politik, Arsim Haziri, thotë se koalicioni PAN po mundohet të blejë kohë pasi tashmë është dëshmuar se nuk i kanë numrat për kryekuvendarin e as qeverinë.
“Kadri Veseli përmes arrogancës së shembullt politike është duke pretenduar qëllimisht të zhagisë konstitumin e kryesisë së Kuvendit deri edhe kur më 7 gusht përfundon afati kushtetues, vetëm që situatat e mëpastajme të jenë në favorë të ambicieve të tyre politike. PAN në krye me z. Veselin përderisa situatat nuk janë në favor të tyre, do të mundohen të neglizhojnë procese pavaresisht se janë të kushtueshme për shoqërinë tonë”, thotë Haziri për tesheshi.com.
/tesheshi.com/
