Kryeministri grek Kyriakos Mitsotakis i bëri thirrje presidentes së re të Maqedonisë së Veriut, Gordana Siljanovska-Davkova, që t’u kthehet detyrimeve ligjore dhe sjelljes që rrjedh nga roli i saj si presidente.
Ky reagim i kryeministrit grek vjen pasi Gordana Siljanovska-Davkova, presidentja e parë e Maqedonisë së Veriut, refuzoi të shqiptojë emrin e ri të vendit, i cili përdoret që nga marrëveshja me Greqinë në vitin 2018, gjatë ceremonisë së betimit.
“Deklaroj se detyrat e presidentit të Maqedonisë do t’i kryej me ndërgjegje dhe përgjegjësi, se do të respektoj Kushtetutën dhe ligjet dhe se do ta mbroj sovranitetin, integritetin territorial dhe pavarësinë e Maqedonisë”, tha Siljanovska-Davkova, pa e thënë “e Veriut”.
Gordana Siljanovska-Davkova, kandidate e së djathtës nacionaliste, u zgjodh për një mandat pesëvjeçar në raundin e dytë të zgjedhjeve presidenciale të 8 majit. Ajo mundi socialdemokratin, presidentin në largim, Steve Pendarovoski, me 65 përqind të votave.
Shkelje e detyrimeve kushtetuese
“Greqia refuzon manipulime si ato me të cilat zonja Siljanovska-Davkova hapi mandatin e saj”, ka shkruar kryeministri grek në rrjetin social X dhe i ka bërë thirrje asaj që të respektojë detyrimet ligjore dhe t’u përmbahet obligimeve që dalin nga roli i saj si presidente.
Ai kujtoi gjithashtu se presidentja e re e Maqedonisë së Veriut, Gordana Siljanovska-Davkova, gjatë betimit të saj nuk e ka thënë fjalën “veriore”, e cila është pjesë përbërëse e emrit kushtetues të vendit, dhe kështu ka shkelur tekstin zyrtar të betimit, pasi thirrja e vendit me një emër tjetër është e paligjshme.
Në vitin 2018, Shkupi përfundoi një marrëveshje historike me Greqinë, si pjesë e së cilës u pajtua që emrit të vendit t’i shtohej tipari gjeografik “Veriu”, i cili i dha fund një mosmarrëveshjeje të gjatë me vendin fqinj, i cili bllokoi anëtarësimin e tij në NATO dhe negociatat e anëtarësimit me Bashkimin Evropian. /tesheshi.com/
