Zbulohet në Mitrovicë, qendra dhe skema e falsifikimit të veturave të vjedhura për të shmangur detyrimet doganore.
Operacioni i emërtuar “Passat 2015” ka arritur të sekuestrojë 175 vetura të çmontuara dhe të falsifikuara në mënyrë që të hyjnë në qarkullim jo vetëm në Kosovë por edhe në vende të rajonit.
Avni Sahiti, zëdhënësi i policisë për rajonin e Mitrovicës theksoi se “si rezultat i përpunimit të informatave në fushën e parandalimit të veprimtarive kriminale, njësia rajonale e auto-krimeve, në kuadër të Drejtorisë Rajonale në Mitrovicë në dy ditët e fundit ka realizuar planin operativ të koduar “Pasat 2015’’.
Të gjitha këto vetura të identifikuara dyshohet të jenë importuar nga shtetet evropiane, po ashtu dyshohen për shmangie të obligimeve doganore.
Ky kontroll i vendeve të riparimit dhe çmontimit ka rezultuar me identifikimin e 175 veturave të çmontuara, dokumentacioni i të cilave nuk figuron në sistemin e rregullt të obligimeve doganore.
I gjithë dokumentacioni i këtyre veturave të hasura tek personat në posedim u është dorëzuar autoriteteve doganore për procedurë të mëtejme.
Ndërsa hetuesit policorë me autorizim të Prokurorisë Themelore në Mitrovicë do të vazhdojnë hetimet drejt verifikimit të prejardhjes së këtyre veturave, statusi i tyre, shtetet prej nga kanë ardhur.
“Verifikim do bëhet si në nivel lokal edhe në atë ndërkombëtar përmes ILECU-t në Prishtinë, operacion ky që pritet që zbardhë në tërësi fatin e këtyre makinave që kryesisht janë prodhime të reja”, ka thënë Zahiti.
/tesheshi.com/
