Rreth dhjetë makina të Kuvendit Komunal të Mitrovicës janë dëmtuar nga pesë ish-punonjës të sigurimit të auto-parkingut, të cilët në këtë punë ishin emëruar si anëtarë të shoqatës së Veteranëve të Luftës së UÇK-së.
Dëmtimin e veturave e ka konfirmuar edhe zëdhënësi i policisë për rajonin e Mitrovicës, Avni Zahiti, i cili ka bërë me dije se për këtë rast janë arrestuar katër persona që dyshohen të kenë kryer këtë vepër.
Në anën tjetër, kryetari i shoqatës së Veteranëve të UÇK-së të zonës operative të Shalës, Rafet Ibishi i ka thënë portalit tesheshi.com se “të pesë veteranët e luftës së UÇK-së që kanë qenë të punësuar në sigurim të parkingut kanë qenë të detyruar të ndërmarrin një veprim të tillë, pasi kontrata e punës iu është shkëputur në mënyrë të njëanshme.
“Andaj kërkojë nga policia e Kosovës që sa më para t’i lirojë të katër të arrestuarit”, ka thënë Ibishi.
Ndërsa Jeton Ujkani, drejtor i Drejtorisë për Prokurorim në Komunën e Mitrovicës ka theksuar për portalin tesheshi.com se komuna ka qenë e detyruar që të shkëpusë këtë kontratë me veteranët e UÇK-së, pas rekomandimit nga ana e auditorit të përgjithshëm.
Edhe për të, punësimi i tyre ka qenë krejt i rregullt.
“Komuna, gjegjësit kryetarAgim Bahtiri, në marrëveshje me kompaninë që ka marrë menaxhimin e këtij parkingu, ka rënë dakort që këta pesë veteranë të UÇK-së të punësohen në kompaninë që ka fituar tenderin, e për këtë ekzistojë të gjitha shkresat”, ka thënë Ujkani.
Por ai nuk di ta shpjegojë se si është marrë ky vendim për largimin e tyre nga puna.
“Se si ka rrjedh ngjarja që këta pesë veteranë të UÇK-së të ndërmarrin një veprim të tillë dhe se kush qëndron mbrapa tyre, ne nuk e dimë, por presim që policia e Kosovës ta zbardhë këtë rast” ka thënë i pari i Prokurorimit në Mitrovicë.
“Drejtoria e Prokurimit ka lidhur kontratë me shoqatën e OVL të UÇK-së dega në Mitrovicë, prej vitit 2012 dhe e kemi vazhduar për çdo vit, siç ka ndodhur edhe sivjet me datën 1.1.2016” ka shtuar Ujkani .
“Kontrata ka qenë e vazhduar, mirëpo ne kemi qenë të obliguar ta shkëpusim njëanshëm këtë kontratë, duke u bazuar në nenin 5 të saj, pas rekomandimit të auditorit gjeneral, gjë e cila ka ndodh nga 1.6.2016”, ka saktësuar ai.
Sipas tij, për të gjitha këto vendime me kohë janë njoftuar të 5 veteranët që kanë qenë të punësuar në auto-parking si dhe shoqata e veteranëve të luftës së UÇK-së në Mitrovicë. /tesheshi.com/
