Vajza e cila teshtin 12 mijë herë në ditë ka befasuar dhe lënë pa fjalë mjekët. 12 vjeçarja Katelyn Thornley është e shqetësuar se nuk po shpëton dot nga kjo gjendje aspak e ndashme, nga e cila është prekur pa kuptuar dhe në mënyrë të papritur rreth tre javë më parë.
Ajo thotë: “Kam vazhdimisht dhembje në muskujt e barkut, kam këmbët shumë të dobëta dhe me zor ushqehem”. Vajza teshtin 20 herë në minuta dhe nuk mund të shkojë në shkollë. E vetmja kohë kur ajo ndalon së teshtiri është kur fle gjumë natën dhe pasi merr ilaçe të quajtura ‘antihistamina’.
Teshtimat e saj të pandalura nisën një ditë, ndërsa vajza ishte duke marrë mësime klarinete. Katelyn shprehet: “Fillimisht nisa të teshtij vetëm pak. Mendova se isha alergjike nga ndonjë gjë, ose ndoshta nuk kisha pastruar siç duhet pjesën e klarinetës që futet në gojë”.
Gjashtë mjekë e kanë ekzaminuar deri më tani, por asnjëri prej tyre nuk ka arritur t’i japë një kurë efektive. Ata kanë bërë të gjitha analizat e alergjisë dhe shprehen se gjithçka mund të jetë si pasojë e një gjendje stresuese. Prindërit e Katelyn dolën në një intervistë në televizor në shtetin e Texasit, ku edhe jetojnë, ndërsa kërkojnë ndihmë për vajzën e tyre.
Mamaja e saj tha: “Duam shumë që e gjithë kjo të ndalojë sa më parë. Është shumë e vështirë një jetesë e tillë”. I ati i vajzës shprehet: “E kemi të pamundur ta shikojmë kështu. Teshtin gjatë gjithë kohës dhe nuk është e lumtur as me veten e vet”.
Katelyn vetë do që kjo gjendje në të cilën ajo është duke jetuar, të ndalojë sa më parë. “Ndonjëherë dua të dal jashtë trupit tim dhe të gjej sadopak qetësi apo paqe, sepse ndonjëherë, edhe kur fle gjumë apo ëndërroj, teshtij”,- janë fjalët e 12 vjeçares./tesheshi.com/
