Nga Blendi Gashi
Mimoza Kusari-Lila, femra që la politikën e madhe për t`ju përkushtuar asaj lokale, menaxhimit të një qyteti si Gjakova, është vënë së fundi në qendër të vëmendjes për një deklaratë jo të zakontë, se kanë dashur ta vrasin.
Dhe sa për kujtesë, po u sjellim një profil të saj politik:
Ajo ka arritur një pozitë që asnjë femër më parë në nivelin lokal nuk ka mundur ta bëj. Është e para kryetare femër e një komune në Kosovë.
Ajo mposhti një burrë, kandidatin e AAK-së për kryetar të Gjakovës, Pal Lekaj, duke treguar se edhe gratë janë të ‘forta’, vetëm se duhet t’u jepet shansi të jenë në garë.
Pasi mori udhëheqjen e një prej komunave më të shkatërruara nga lufta, Gjakovën, e pranoi për mediat shqiptare se e presin shumë sfida.
Dhe ashtu, ndodhi. Mimoza është ballfaquar dhe po vazhdon të përballet me sfida të shumta.
Kryetarja e Gjakovës gjatë debatit të mbajtur të hënën në Asamblenë Komunale, ka thënë se është kërcënuar me ekzekutim fizik, dhe për këtë ka deklaruar se dikush është paguar financiarisht.
“E them publikisht se kam mbrojtje të afërt për shkak se është paguar dikush që të më ekzekutoj fizikisht”.
“Kjo informatë nuk ka dalë nga odat, por është informacion që policia e Shqipërisë ia ka kumtuar policisë së Kosovës. Për pasojë, kam marrë urdhër nga drejtori i Përgjithshëm i Policisë së Kosovës për mbrojtje të afërt”.
“Pazari dhe biseda për ekzekutimin tim është bërë në Gjakovë”, ka deklaruar ajo.
Por, përkundër kërcënimeve, Mimoza ka thënë për mediat se ‘shqetësohet nga kërcënimet e tilla por nuk frikësohet, dhe nuk i di motivet ose pse mund të ketë marrë kërcënime’.
Kusari-Lila, tash e disa muaj është nën përcjellje të afërt nga Policia e Kosovës.
Kritikat dhe lavdatat për Mimozën
Mimoza, që nga marrja e detyrës vazhdon përplasjet me partinë që ishte në pushtetm AAK-në, e cila është kritikuesja më e madhe e saj.
“Mimozë, mos vajto! Puno se e ke humbur rrugën në oborr!”, ka qenë mesazhi i AAK-së drejtuar të parës së Gjakovës.
Kusari-Lila, i është kundërpërgjigjur akuzave të opozitës duke thënë se AAK-ja i mashtroi keq gjakovarët.
Ka pasur edhe të tillë që vlerësojnë lartë punën dhe figurën e Kusari-Lilës. Kryeministri i Shqipërisë Edi Rama, gjatë një vizite bërë në qytetin e Gjakovës kishte thënë: “Lum Gjakova që Mimoza Kusari – Lilën e keni kryetare”.
Pozitat udhëheqëse të Kusari-Lilës para se të bëhet kryetare e Gjakovës
Mimoza, para se ta merrte pozitën e të pares së Gjakovës ka qenë zëvendëskryeministre e Republikës së Kosovës dhe ministre e Ministrisë së Tregtisë dhe Industrisë të Kosovës.
Mimoza Kusari-Lila u bë pjesë e politikës dhe shërbimit publik, në vitin 2003, kur iu ofrua pozita e zëdhënëses dhe këshilltares politike të kryeministrit të atëhershëm të Kosovës, Bajram Rexhepi.
Që nga dhjetori i vitit 2009 është zgjedhur zëvendëspresidente e Aleancës Kosova e Re, parti kjo e biznesmenit të njohur Behxhet Pacolli.
Kusari – Lila ka magjistruar për administrim biznesi në Shtetet e Bashkuara të Amerikës. Gjatë kësaj kohe ajo vijoi studimet në Institutin Ekonomik, Universiteti i Kolorados dhe Universitetin e Duquesne në Pittsburg, ku përfundoi magjistraturën në e-biznes. Studimet e larta, Mimoza Kusari-Lila, i kreu në Univeristetin e Prishtinës në Fakultetin Ekonomik, ku diplomoi në sistemet e manaxhimit dhe informatave.
Përpara se të ekspozohej në politikë, Mimoza Kusari-Lila shërbeu si drejtoreshë ekzekutive në Odën Ekonomike Amerikane në Kosovë (AmCham), prej vitit 2006-2009, duke e akredituar zyrtarisht këtë institucion me Odën Amerikane në Uashington D.C dhe Asociacionin e Odave Amerikane në Evropë. /tesheshi.com/
