Britania përballet më 7 maj me zgjedhjet më të paparashikueshme që nga vitet 1970, ndërsa pjesa më e madhe e anketimeve i tregojnë laburistët dhe konservatorët të jenë në të njëjtat pozita.
Ndërkaq, të dy krahët politikë po përpiqen të bëjnë apo të thonë diçka për ta prishur këtë ekuilibër.
Kështu, Ed Miliband, udhëheqësi i laburistëve, iu drejtua mbështetësve në Mançester, një fortesë tradicionale, me fjalët, “Unë jam gati!”, dhe shpalli manifestin e partisë së tij, ku vëmendje kryesore i është kushtuar ekonomisë.
Miliband kërkon të ndreqë një perceptim të gabuar se partisë së tij nuk mund t’i besohet mbi ekonominë, një perceptim i krijuar nga qeverisja e laburistëve në vitet 1997-2010.
Laburistët qenë në pushtet në kohën e krizës financiare globale, dhe e lanë Britaninë me deficitin më të madh në kohë paqeje pas Luftës së Dytë Botërore.
Konservatorët i kanë portretizuar vazhdimisht laburistët si shkatërrues të ekonomisë britanike.
Me fjalët, “Një plan më i mirë, një e ardhme më e mirë,” në sfond, Miliband u tha mbështetësve, “Ju doni vlerat laburiste dhe një fillim të ri, por kërkoni të dini në mund të jemi përgjegjës për financat e popullit tonë. Ky është një plan për të ndryshuar vendin tonë. Eshtë një manifest i cili tregon se Partia Laburiste nuk është vetëm parti e ndryshimit, por dhe parti e përgjegjësisë.”
Miliband i paraqiti në mesazhin e tij laburistët si parti të të gjithë britanikëve, e konservatorët si parti për të pasurit.
Ai gjithashtu premtoi se laburistët do ta ulnin çdo vit deficitin buxhetor.
Pretendenti për kryeministër u kërkoi mbështetësve të mobilizoheshin për zgjedhjet, pasi fatin e tyre mund ta përcaktonin një grusht votash.
Cameron do ta shpallë sot programin politik të konservatorëve. /tesheshi.com/
