“Jo terrorizmit, po vëllazërisë,” ishte motoja e një karvani të pafund turqish që nisën manifestimin sot pasdite në kryeqytetin e vendit kundër akteve terroriste të PKK-së, Partisë së Punëtorëve të Kurdistanit.
Në “Marshimin e Unitetit” gjetën vend anëtarë OJQ-sh, sindikalistë, si dhe pjesëtarë të shoqërisë civile. Si simbol i unitetit ishte një flamur turk gjigand, një kilometër i gjatë, i cili mbahej nga protestuesit.
Flamuri turk ishte e vetmja gjë që mund të mbanin manifestuesit në duar, ndërsa mungonin simbolet apo flamujt e partive politike, në përpjekje për të dhënë një shenjë bashkimi të 78 milionë qytetarëve turq në këto ditë të vështira që po kalon vendi.
Manifestimi u organizua nga një koalicion OJQ-sh, sindikatash dhe grupesh biznesi.
Ndërkohë, të dielën do të ketë një tjetër manifestim kundër terrorizmit, të planifikuar për t’u mbajtur në Stamboll, e të organizuar nga Platforma e Solidaritetit Civil. Eshtë lajmëruar se në të do të marrin pjesë dhe presidenti e kryeministri i vendit, Rexhep Tajjip Erdogan dhe Ahmet Davutogllu. Slogani i manifestimit do të jetë, “Miliona frymë si një zë kundër terrorit.”
Turqia gjendet prej kohësh nën sulmet e PKK-së, organizatës terroriste kurde, e cila i dha fund këtë verë një armëpushimi dyvjeçar. Shtetarët e lartë turq janë zotuar se do ta çojnë gjer në fund luftën ndaj kësaj organizate, derisa të “mos mbetet asnjë terrorist,” me fjalët e Erdoganit.
Vendi përgatitet për zgjedhjet e parakohshme të 1 nëntorit, që janë vendimtare për daljen nga kriza politike. Përsëritja e rezultatit të zgjedhjeve të qershorit do të ishte lajmi më i keq për Turqinë, teksa për t’i bërë ballë situatës së trazuar kërkohet një qeveri e fortë, e krijuar mundësisht nga një parti e vetme. /tesheshi.com/
