Ambasadori i Shteteve të Bashkuara të Amerikës në Tiranë, ka zgjdhur një aktivitet të përgatitur nga një ish-pjsëtar i qeverisë së Partisë Demokratike për ti dhënë mesazh opozitës që deklaratat e ashpra të SHBA ndaj disa veprimeve të lidershipit të PD-së nuk kanë aspak të bëjnë me qëndrimin ndaj opozitës dhe PD-së në tërësi.
Ambasadori amerikan Donald Lu, i cili ka dhënë më parë mesazhe mos pajtimi me vijën politike të ish-kryeministrit Berisha, ka bërë sot me dije se SHBA mbështet të gjithë popullin shqiptar si dhe përsëriti edhe njëherë qëndrmin për largimin e të inkriminuarve dhe të korruptuarve nga politika.
Deklarata e diplomatit amerikan u bë gjatë një aktiviteti me rastin e 24 vjetorit të raporteve SHBA-Shqipëri, aktivitet i organizuar nga një OJF e përfaqësuar nga ish-zv ministrja e Jashtme Edith Harxhi dhe ku merrte pjesë Presidenti i Republikës, Bujar Nishani. Ambasadori Lu theksoi se Shtetet e Bashkuara, nuk i besojnë një partie politike apo lideri në vendin tonë, por shqiptarëve, që duan të ndahen nga krimi e korrupsioni
Për këtë ambasadori Donald Lu thotë se shqiptarët në këtë betejë të rëndësishme kanë në krah SHBA-në. “Populli shqiptar sot vazhdon të ndeshet me trashëgiminë e komunizimit. Ata duhet të luftojnë me forcat e krimit dhe të korrupsionit çdo ditë, në shkollat, bizneset gjykatat e tyre madje dhe në parlamentin e tyre. Shqiptarët janë një popull i fortë dhe ne jemi besimplotë se Shqipëria është e gatshme të përballet me këtë sfidë pa pasur frikë. SHBA beson tek Shqipëria, jo nga një parti e veçantë politike apo nga një udhëheqës të vetëm politik, por tek aftësia e shqiptarëve guximtarë për të mbëshetur ndryshimin dhe për të bërë sakrificën për veten dhe fëmijët e tyre. Mbetem besimplotë se në fund të ditës pjesa më e madhe e shqiptarëve që përkrahin ndershmërinë dhe integritetin do të triumfojnë mbi ata që përkrahin krimin, korrupsionin. Unë zotohem që shqiptarët do të vazhdojnë të kenë mbështetjen e SHBA-së në këtë betejë të rëndësishme”.
Edhe Presidenti i Republikës, që fliste për herë të parë publikisht pas akuzave që kanë përfshirë politikën ditën e fundit, kërkoi jo vetëm që dekrimiminalizimin e saj, por i përcolli një mesazh drejtësisë, duke i kërkuar të qëndrojë imune nga presioni.
