Është e rëndësishme për ne që Ballkani Perëndimor t’i bashkohet familjes evropiane, tha kryeministrja italiane Giorgia Meloni pas takimit me presidentin serb Aleksandar Vuçiç në Beograd.
Ajo shtoi se presidenti i Serbisë e di se mund të llogarisë në mbështetjen e Italisë, për të përshpejtuar procesin e afrimit me BE-në.
Meloni theksoi se Serbia ka një rëndësi strategjike edhe për Italinë dhe tha se në kohën kur ka kriza të mëdha po hapen mundësitë për të dy vendet për të punuar edhe më mirë, kur flitet për tranzicionin energjetik dhe inteligjencën artificiale dhe fusha të tjera në të cilat ata mund të bashkëpunojnë.
“Prandaj jemi këtu dhe do të vazhdojmë të jemi ndër vendet e para që mbështesin procesin e zgjerimit, jo aq zgjerimin sa ribashkimin e Evropës, sepse Evropa nuk është një klub ku vendoset se kush duhet të jetë apo jo. Ajo që duhet të bëjnë institucionet europiane është një proces serioz dhe i shpejtë për të garantuar bashkimin e të gjithë Europës”, tha Meloni.
Përmirësimi i marrëdhënieve
Ajo ka shtuar se e di që Serbia do të vazhdojë të ketë qasje konstruktive në dialogun me Kosovën.
“Italia po e ndjek atë proces dhe ne po punojmë që të realizohen të gjitha detyrimet që palët kanë marrë përsipër”, shtoi ajo.
Ai beson se shkëmbimi tregtar mund të jetë edhe më i madh, si dhe investime që do të krijonin më shumë vende pune, duke kujtuar se rreth 150,000 punëtorë punojnë në kompanitë italiane në Serbi.
Presidenti i Serbisë Aleksandar Vuçiç tha se kanë biseduar për të gjitha çështjet e rëndësishme për marrëdhëniet mes dy vendeve dhe se kanë konstatuar se Serbia dhe Italia kanë marrëdhënie të mira politike dhe ekonomike.
Ai theksoi se beson se vizita do të kontribuojë në përmirësimin e mëtejshëm të marrëdhënieve ndërmjet Serbisë dhe Italisë, duke theksuar se “Italia i qaset zgjidhjes së problemeve në rajonin tonë objektivisht dhe rrënjësisht”. /tesheshi.com/
