Raporti i OSBE-së për referendumin në Turqi u cilësua si tendencioz dhe i papranueshëm nga autoritetet turke.
Ministria e Jashtme turke e quajti të papranueshëm deklarimin e raportit se në referendum nuk u përmbushën standardet ndërkombëtare.
Presidenti Erdogan e bëri dje të qartë se raporti i OSBE-së as që do të merrej në konsideratë.
“Mbani vendi tuaj,” do të thoshte ai. Duke shtuar, “As do ta marrim në shqyrtim, as do ta shohim, as do ta njohim raportin tuaj politik.”
Raporti i OSBE-së fliste për mungesë të mundësive të barabarta, për mbulim të njëanshëm mediatik dhe për kufizim të lirive themelore në referendumin për ndryshimet kushtetuese në Turqi.
Në një raportim të ditës së sotme, Daily Sabah e vë në dyshim paanshmërinë e raportit të OSBE-së teksa flet për një mbështetës të organizatës terroriste të PKK-së të dërguar si vëzhgues në referendum.
Ligjvënësi i partisë së majtë gjermane Die Linke, Andrej Hunko, ishte pjesë e delegacionit prej 23 anëtarësh të OSBE-së për vëzhgimin e zhvillimit të referendumit të së dielës.
I njohur si mbështetës i PKK-së, Andrej Hunko ka qenë pjesë e ekipit të OSBE-së në Dijarbakër edhe pse më herët ka marrë pjesë në tubimet e PKK-së dhe i ka kërkuar parlamentit gjerman që ta heqë atë nga lista e organizatave terroriste.
Vetëm një muaj më parë ai do të deklaronte për një të përditshme turke se shpresonte që të votohej për “jo”-në në referendum.
“Shpresoj që njerëzit në Turqi të votojnë për ‘jo’-në në referendum,” citohet ai të thoshte në mars. /tesheshi.com/
