Revista Forbes ka publikuar listën e 100 grave më të fuqishme të botës, dhe vendin e parë ka vijuar ta mbajë kancelarja gjermane.
Angela Merkel gjendet në krye të listës për të pestin vit radhazi, por ndjen tashmë hapin e Hillary Clinton-it, në vend të dytë, dhe që ka mundësi reale për t’ia zënë vendin kancelares.
Sipas Forbes-it, “Ajo (Merkel-i) mund ta humbë titullin e saj për herë të parë që nga 2010-ta ndaj një personi me një mundësi të besueshme dhe matematike të ‘udhëheqjes’ së botës, ndaj Hillary Clinton-it.”
Klinton ka qenë pjesë e listës së Forbes-it që nga viti 2004, si senatore, si sekretare e Shtetit, e tani si kandidate për postin e presidentit të SHBA-ve.
Në vend të tretë në listë është filantropja Melinda Gates.
Mes 19 emrave të rinj në listë është këngëtarja Taylor Swift, e renditur në vendin e 64-t, shefja e politikës së jashtme të BE-së, Federica Mogherini, e renditur e 36-ta, dhe kryeprokurorja e SHBA-ve, Loretta Lynch.
Një tjetër emër që bie në sy është shefja e FMN-së, Christine Lagarde, e cila gjendet në vend të gjashtë. Menjëherë pas saj vjen presidentja e Brazilit, Dilma Rousseff. Ndërsa bashkëshortja e presidentit amerikan, Michelle Obama, ka mbajtur një profil më të ulët, e dhjeta në listë.
Ndër femrat me famë që i përkasin fushës së artit, e renditura më lart është Beyonce, në vend të 21-të, e pasuar nga Angelina Jolie në vend të 54-t. /tesheshi.com/
