Kombëtarja shqiptare e futbollit ka vendosur të festojë në Prishtinë kualifikimin në kampionatin europian “Francë 2016”, raporton medium serb kurir.rs.
Në bazë të asaj që është raportuar në mediat kosovare, të cilat kishin shkruar se FSHF e ka pranuar ftesën e kryetarit të futbollit në Kosovë, Fadil Vokrri për të luajtur një ndeshje miqësore më 9 ose 17 nëntor në Prishtinë, serbët po e shohin si një “provokim” të rradhës nga shqiptarët.
Mediumi serb ka cituar deklaratën e zëdhënëses së FSHF-së, Jona Dervishi për një medium kosovar në të cilin kishte thënë: “Mendoj që Kombëtarja do të vijë herën tjetër në Prishtinë, për ndeshjen miqësore në nëntor”.
Më tej kurir.rs shton se në kombëtaren shqiptare të futbollit janë 14 lojtarë që vijnë nga trevat e Kosovës dhe kjo ardhje e tyre është një provokim pasi shqiptarët e dine mirë situatën politike në Kosovë. Federata Ndërkombëtare e Futbollit (FIFA) më herët kishte lejuar që ekipi i Kosovës të luaj vetëm ndeshje miqësore, por pa shfaqjen e simboleve shtetërore.
Pranimi FFK-së në UEFA do të diskutohet në mars të vitit të ardhshëm në Kongresin e Budapestit.
/tesheshi.com/
