Regjisori i njohur kosovar Fatos Berisha ka ndarë me publikun përvojën e hidhur e më pas të lumtur në lidhje me kuletën, harruar në një taksi, me taksistin që e gjen dhe ia kthen në dorë mallin e harruar në pronën e tij, që zakonisht përkthehet si kasafortë parash.
Fjala është për një kuksian, të cilin Berisha e përmend me emër e mbiemër.
“Dje në Tiranë. Mora taxi për te TullaCulture dhe me taksistin (me prejardhje nga Kukësi) bëmë bisedë të këndshme rreth Kosovës, Kukësit, Londrës, çmimeve e të ngjashme. Zbrita te Tulla, dhe ai aty e kuptoj çfarë dhe ku ishte Tulla. Por, unë nuk kuptova që në atë taksi më kishte rënë kuleta (me gjitha kartelat e leternjoftimin). Ndërkohë, taksisti kishte gjetur kuletën, nga ID ime e kuptoi e kujt ishte, dhe mori mundin të hulumton në internet për të gjetur ndonjë kontakt të Tulla Center. E gjenë dhe u shkruan, duke lënë kontaktin e tij. Dhe krejt në fund, edhe ma sjell kuletën aty ku më kishte lënë. Ai quhet Halil Hafuzi. Ende ka njerëz të mirë. Një qytetar i ndershëm i Tiranës që duke bërë vepër të mirë i bën nder edhe qytetit”, shkruan regjisori Fatos Berisha.
Nga ana tjetër, kryebashkiaku Veliaj e riposton këtë mesazh duke shkruar:
“Tirana qyteti më i sigurt në rajon, meritë e njerëzve të thjeshtë që kuptojnë se Tirana mikpritëse është formula e suksesit tonë”.
Duhej të kishte shkruar: edhe falë njerëzve të zbritur nga veriu, siç kuksiani i ndershëm Halil Hafuzi. /tesheshi.com/
