Marrëveshja me Serbinë për sigurime kufitare, analistët: ja si Kosova ia ka fut vetes

Nga Bashkim Kastrati

Marrëveshja për sigurime kufitare mes Republikës së Kosovës dhe Republikës së Serbisë, e cila nga dje ka filluar të zbatohet, po konsiderohet si shumë e dëmshme për qytetarët e Kosovës.

Sipas analistëve kjo marrëveshje pritet të dëmtojë qytetarët e Kosovës me dhjetëra miliona euro pasi që çdo makinë e Kosovës që hynë në Serbi do të bëjë një pagesë vjetore prej 40 eurove, ndërsa makinat me targa serbe që hynë në Kosovë nuk obligohen të paguajnë asnjë cent.

Gjithashtu makinat me targa RKS do të paguajnë gjatë çdo hyrje në territorin e Serbisë një shumë prej 5 euro për t’u pajisur me tabela shtesë me mbishkrimin “PROVA”.

Ndërsa ata që akoma mbajnë tabelat e vjetra me targa KS nuk janë të obliguar të paguajnë tabela shtesë. Kosova mund të jetë shteti i vetëm në botë që vetëm për një territor ka tabela të veçanta.

Në anën tjetër, makinat serbe që hyjnë në Kosovë nuk do të kenë nevojë fare t’i ndërrojnë tabelat e tyre. Marrëveshja e arritur në Bruksel ka hyrë në fuqi sot, ndërsa ajo po shihet më shumë në favor të Serbisë, e në dëm të Kosovës.

Analisti Blerim Burjani, ka thënë për tesheshi.com se kjo marrëveshje është diskriminuese për qytetarët e Kosovës dhe e njëanshme pasi që i konvenon vetëm Serbisë.

“Kjo marrëveshje i konvenon Serbisë për të vazhduar me gënjeshtra, kjo nuk është marrëveshje, kjo është pabarazi e plotë, kjo s’ka të bëjë kurrgjë me marrëveshje ndërkombëtare dhe është plotësisht e paqartë. Sërish autoritet shtetërore shkelen autorizimet ligjore të vendit përballë Serbisë”, thotë Burjani.

Ndërsa analisti tjetër Kushtrim Gashi, ka thënë për tesheshi.com se marrëveshja e arritur për sigurime kufitare ndërmjet Kosovës dhe Serbisë, ishte cënuar rëndë atëherë kur u shty zbatimi i saj edhe pse parashihej që të zbatohej me 24 korrik të këtij viti. Ai thotë se me këtë u dha një mesazh se Serbia nuk është e gatshme të zbaton marrëveshjet ndërshtetërore edhe pse ato janë asimetrike dhe të favorshme për të.

“Zbatimi i marrëveshjes për sigurimet kufitare u bë atëherë kur donte Serbia e jo kur ajo parashihej. Si e tillë kjo marrëveshje është diskriminuese, jo reciproke dhe jo demokratike sepse qytetarët e Kosovës detyrohen që të paguajnë 40 euro për të hyrë në Serbi, kurse serbet që hyjnë në vendin tonë asnjë metelik, andaj kjo marrëveshje është asimetrike dhe marrëveshje të tilla nuk i duhen Kosovës”, theksoi Gashi, duke shtuar se të nënshkruash marrëveshje që jo vetëm nuk janë reciproke për qytetarët e vendin tonë, por përkundrazi janë diskriminuese dhe jo demokratike, kjo nuk është asgjë tjetër pos dhunim i të drejtave qytetare dhe akteve ndërkombëtare.

Kjo marrëveshje e dëmton buxhetin e Kosovës dhjetëra miliona euro

Dhe publicisti Faik Krasniqi këtë marrëveshje e konsideron diskriminuese për qytetarët e Kosovës dhe favorizuese për ata të Serbisë.

“Është absurde dhe tepër diskriminuese, që qytetarët e Kosovës të paguajnë 40 euro për të hyrë në Serbi, e në anën tjetër serbët që hyjnë Kosovë asnjë cent! Me këtë marrëveshje edhe buxheti i Kosovës do të dëmtohet prej dhjetëra miliona euro! Marrëveshja do të duhej të bëhej në mënyrë reciproke, si për shqiptarët që hyjnë në Serbi, poashtu edhe për serbët që hyjnë në Kosovë, me përjashtim të shqiptarëve të Kosovës Lindore!”, u shpreh Krasniqi.

Në lidhje me këtë marrëveshje ka reaguar edhe drejtori i Institutit Riinvest, Lumir Abdigjiku. Ai ka thënë se është skandaloz trajtimi dhe pranimi i pabarazisë në relacion me Serbinë.

“Plot 40 euro për ne 0 për ta, e me targa “Probne” në vend të RKS, nuk kanë lidhje me reciprocitet e as me përparim. Nuk e kuptoj e as mirëkuptoj tolerancën e palës sonë për marrëveshje të pabarabarta sinqerisht. Hajde ata nuk na njohin, por me çfarë rezoni legjitimojmë ne mosnjohjen nga ta? Thuajse e kanë me të drejtë. Pse nuk jemi insistues për shtetësinë tonë sa ata për anti-shtetësinë, sidomos në fushat ku mund të vendosim lehtë? Dhe na thonë kemi reciprocitet. Marrëzi”, ka deklaruar Abdigjiku.

Mbi 300 mijë automjete hyjnë nga Serbia në Kosovë brenda një viti

Brenda një viti nga Serbia në Kosovë hyjnë mbi 300 mijë automjete me targa të Serbisë dhe nëse bëhet një kalkulim i thjesht që sasia e njëjtë me targa të Kosovës futet në Serbi atëherë Serbia do të përfitojë një shumë prej 12 milionë eurove në vit vetëm nga sigurimi i qytetarëve të Kosovës pa i llogaritur ata që me tabela RKS do të duhet çdo herë të paguajnë për t’u pajisur me tabela provizore edhe nga 5 euro.

Dëmet që janë shkaktuar që disa vite nga automjetet me targa të Serbisë në Kosovë duhet të kompensohen nga kompanitë e sigurimeve të Kosovës. Sipas të dhënave të Fondit të Garancisë së Kosovës (FGK), mbi 20 milionë euro llogariten të jenë humbjet buxhetore për 10 vite nga mos pagesa e policës kufitare të automjeteve të Serbisë. /tesheshi.com/