Nga redaksia
Sot për Mitrovicën duhet të ishte një ditë e re, me një ngjarje të re: heqjen e të ashtëquajturës “Parku i Paqes’ nga ura e Ibrit, e parashkuar kjo në Marrëveshjen e Brukselit, firmosur nga Prishtina dhe Beogradi.
Por ja ku erdhi data 15 tetor dhe “Parku” i serbëve, që vetëm paqe nuk mund të përcjellë, është aty. Themi “i serbëve”, pasi janë ata që vendosin. Siç dhe në rastin më të fundit, ku sipas një burimi ndëkombëtar në Mitrovicë, nga Beogradi ka ardhur direktiva që “Parku” mos lëvizë.
Çfarë ironie: Në marrëveshje ishte dhe Asocacioni i komunave serbe – Zajednica, siç i thonë – i cili padyshim që po zbatohet pikë për pikë, por jo dhe heqja e “Parkut të Paqes”. 
“Ura mbi Ibër edhe për një kohë të gjatë do të frymojë me mushkëri të sfilitura duke bartur me veten barrikadën “Parkun e Paqes” dhe duke mos kryer funksionin për të cilën është ndërtuar shekuj më parë”, mësohet të jetë shprehur një pjesëtar i misionit ndërkombëtar në Kosovë. Ndërkohë që po pjesëtar, duke shërbyer dhe si burim konfidencial, ka deklaruar se qeveria e Serbisë nuk është e gatshme dhe nuk ka vullnet të mirë për ta larguar barrikadën “Parkun e Paqes”, nga ura e lumit Ibër, ndërsa kryetari i komunës së veriut të Mitrovicës, Goran Rakiq, njeriu që duhet të angazhohet drejtpërsëdrejti në zbatimin e marrëveshjes së Brukselit, është vetëm një kukull që nuk pyetet për asgjë, pasi për të gjitha, në urë dhe Veri vendos Beogradi.
Sipas burimit, vetëm me një presion të fortë të Brukselit ndaj kryeministrit Vuçiq, barrikada mund të largohet, në të kundërtën ‘Parku i Paqes’ do të jetë aty, sepse serbët e Veriut nuk i pyete askush.
“Kryetari i Komunës së veriut të Mitrovicës Goran Rakiq, ka marr një telefonatë të mërkurën në mëngjes nga Beogradi dhe është këshilluar që në asnjë mënyrë të mos jep pajtimin e tij për largimin e barrikadës”, ka thënë burimi.
Më tej ai ka shtuar se ministri serb i qeverisë së Kosovës, Lubomir Mariq, që është edhe i deleguari personal i Vuçiqit për të qenë mbikqyrës për zhvillimet në veriun e Kosovës e posaçërisht në Mitrovicë, është pikërisht njeriu i ngarkuar me zbatimin e strategjisë për prishjen e të gjitha marrëveshjeve që janë arritur në Bruksel, në mes të qevesisë së Kosovës dhe asaj të Beogradit, kuptohet përveç Asocacionit, që është dhe fitorja më e madhe e serbëve, por që për të tjerat nuk kanë interes të zbatohen, siç është dhe heqja e “Parkut të Paqes”.
“Mariq, të martën pak minuta pas mesditës, në Picerin N-1 në veri të Mitrovicës, është takuar me Goran Rakiqin dhe, pas një këshillimi “miqësor’, ky i fundit ka thirrur gazetarë serb të Beriut duke lëshuar një deklaratë se barrikada “Parku i Paqes”, nuk do të hiqet deri sa të përcaktohet kufiri ndarës në mes të dy komunave të Mitrovicës”, ka thënë burimi i portalit tesheshi.com.
Si reagimi i deritanishëm është ai kryetarit të komunës së jugut të Mitrovicës, Agim Bahtiri, i cili ka kërkuar nga vendorët dhe ndërkombëtarët që “të mos luajnë me zjarr, por ta largojnë barrikadën”. Ndërsa Edita Tahiti, ministre për Dialog, ka thënë me bindje se me 15 tetor, barrikada do të largohet nga aty.
Më 25 gusht në Bruksel është nënshkruar një marrvëshje në mes të palës kosovare dhe asaj serbe me ndërmjetësim të BE-së ku parashihet se më 15 tetor, barrikada “Parku i Paqes” do të largohet nga aty duke lejuar fillimin e punimeve për rinovimin e urës.
Por deri më tani nuk ka asnjë lëvizje dhe as që pritet të ketë, pikërisht nga ajo çfarë ka informuar burimi ndërkombëtar për tesheshi.com.
Ndërkohë mësohet se zyrtarë të NATO-s, nga frika e eskalimit të situatës së sigurës kanë filuar rivendosjen pikës së vrojtimi mbi Qendrën e Kulturës në Mitrovicës, e cila gjendet në skajin jugor të urës së Ibrit.
Kjo pikë vrojtimi ushtarake tek taraca e godinës “Rexhep Mitrovica” është mbajtuar nga KFOR-i për 14 vite, që pas përfundimit të luftës në Kosovë, por para dy viteve ajo është larguar nga aty, për t`u rikthyer si më parë.
Po ashtu, edhe policia e Kosovës ka rritur gjendjen e gadishmërisë si në Veri ashtu edhe në Jug për ditën e sotme nga frika e eskalimit të situatës.
Barrikada e ashtuquajtura “Parku i Paqes” është vendosur nga qeveria e Serbisë më 18 qershor 2014, në urën kryesore të lumin Ibër, duke ndarë qytetin e Mitrovicës në dysh. /tesheshi.com/
