Pasditen e sotme përfaqësuesit e partive politike të cilët janë pjesë e grupeve të punës tentojnë për herë të dytë që të zbatojnë kërkesat e dala nga marrëveshja politike ndërsa pika e parë është legjislacioni zgjedhor.
Siç mësohet, grupet e punës do të jenë të shoqëruara nga ekspertë të OSBE-së, pasi në disa cikle zgjedhore vërejtjet e ODIHR-it kanë qenë: pastrimi i listave zgjedhore nga votuesit fiktivë, rikompozimi i Komisionit Shtetërorë të Zgjedhjeve dhe ndryshimet në Kodin Zgjedhor.
Akoma nuk është e sigurt për formatin e takimit pas dështimit të atij të së hënës për të cilin opozita maqedonase akuzoi pushtetin se qëllimisht po pengon dhe këtë e arsyetojnë me faktin se anulimin e takimit e kanë lajmëruar pesë minuta para mbajtjes, me pretekst se ministri i jashtëm Nikolla Popovski, i cili është pjesë e grupit, gjendet jashtë shtetit.
Ndërkohë, informacionet të cilat vijnë nga partia shqiptare në pushtet flasin se takimi i sotëm mund të mos jetë fare takim pune. Burimet e njejta në kushte anonimiteti thonë se ata vetëm do të dëgjojnë rekomandimet e OSBE/ODIHR-it për atë se cilat janë pritjet e tyre, dhe çka saktësisht presin nga grupet e punës gjatë zbatimit të reformave.
Përgatiti: Bekim Laçi tesheshi.com
