Refugjatët nga Afrika e Veriut duhet të rikthehen në vendet e tyre, pasi të nxirren nga deti në udhëtimet e tyre të rrezikshme përmes Mesdheut e nuk do të mbahen më në Itali, apo të shpërndahen në Europë. Do të ndalohet mbulesa e plotë për gratë muslimane dhe do të mbrohet “Leitkultur” (kultura drejtuese gjermane) si element unifikues i shoqërisë.
Këto janë disa nga kërkesat e një mocioni që u miratua nga drejtuesit e CDU-së, partisë së kancelares Merkel, ndërsa kjo e fundit ka konfirmuar se do të kandidojë për një mandate të katërt në krye të qeverisë gjermane. Mirëpo për të arritur miratimin nga partia dhe mundësinë e një triumfi të ri, pas humbjeve të kohëve të fundit, do të duhet një ndryshim strategjie, për të cilën drejtuesit e CDU-së dhe baza e saj po këmbëngul. Në mocionin në fjalë, këto kërkesa përshkruhen si parimet kardinale mbi të cilat kristian-demokratët duhet të ndërtojnë fushatën elektorale për të siguruar mandatin e katërt për Angela Merkel në zgjedhjet e vitit 2017. Dokumenti me 21 faqe, do të diskutohet më gjerësisht në kongresin e partisë, më 6 dhe 7 dhjetor në Essen.
Në dokument, CDU njofton se dëshiron t’u kundërvihet tendencave populiste: “Populizmi, izolimi nga jashtë, proteksionizmi dhe ndarja e shoqërisë nuk përfaqësojnë një përgjigje për problemet e mprehta të së tashmes dhe së ardhmes, e deri më tani, nuk kanë funksionuar kurrë nga asnjë anë’. Në dokument duket emblematic fakti që në tekstin final është hequr referenca ndaj objektivit për të fituar votat e “humbësve nga modernizmi”, një formulë që nxiste në mënyrë negative zgjedhësit që kanë kaluar në favor të “Alternativës për Gjermaninë”. Në dokument, tashmë flitet vetëm për “rifitimin e besimit të humbur”.
Nga dokumenti sidoqoftë, duket qartë edhe përpjekja e partisë së Merkelit për të ndrequr marrëdhëniet me kushërinjtë bavarezë të CSU-së, duke forcuar profiling konservator.
“Dëshirojmë të ndalojmë emigracionin përmes rrugëve që shkelin të drejtat e azilit”, thuhet në dokument ku kërkohet që azilkërkuesit që iu është refuzuar kërkesa duhet të rikthehen në vendet e origjinës ose të tranzitit. “Objektivi ynë është të luftojmë me sukses emigracionin e paligjshëm nga vendet afrikane, që shpesh nuk vjen nga persekutimi apo luftërat civile, por për shkak të nevojave ekonomike dhe sociale e të ndalojmë në këtë mënyrë me mijëra persona që vazhdojnë të vënë në rrezik jetën. me këtë qëllim duam të arrijmë me vendet afrikane marrëveshje sipas modelit të asaj mes BE dhe Turqisë”, thuhet në dokumentin e publikuar nga “La Stampa”.
Kristian-demokratët do të dëshironin të ngrinin dhe “zona tranziti” në kufij ku të shqyrtoheshin kërkesat për azil, dhe listojnë mbylljen e rrugës ballkanike- kritikuar për një kohë të gjatë nga Merkel – si një nga nismat që kanë pasur sukses në reduktimin e emigracionit të paligjshëm. Ngjarjet e vitit 2015, kur gati një milion refugjatë hynë në Gjermani, sipas CDU-së nuk duhet të përsëriten më, e kjo konsiderohet si një koncesion ndaj partisë simotër bavareze, CSU-së.
Ata që refuzojnë të integrohen “duhet të llogarisin sanksionet që shkojnë deri në kufizime sociale dhe përjashtim”. CDU kundërshton edhe mbulesën e plotë të grave dhe kërkon të shfrytëzojë të gjitha mundësitë e ligjshme për ta ndaluar atë. Partia shprehet kundër “abuzimit me Islamin me qëllim urrejtjen, dhunën, terrorizmin dhe shtypjen” e do të mbyllë xhamitë në të cilat predikohet dhuna e do të dëbojë predikuesit e urrejtjes. Imamët që mbërrijnë shpesh në xhami nga Turqia, “duhet të arsimohen e formohen në Gjermani”.
Dokumenti kërkon edhe më shumë fuqi ligjore për policinë, më shumë vëzhgim me anë të kamerave dhe dënime më të ashpra për vjedhjen e pronës. Në legjislaturën e ardhshme, CDU synon të mos krijojë borxhe të reja, e as të rrisë presionin fiskal.
Përgatiti: Juli Prifti – /tesheshi.com/
