Manchester United fiton ndeshjen më të fortë të javës në Premier League, kundër Arsenalit në Londër, me rezultatin 1-3. Djemtë e Mourinhos që nuk lënë pikë prej javësh, dolën triumfues nga një ndeshje ku të dy palët zhvilluan lojë sulmuese.
Me Pogba të rikthyer në formë të plotë, Manchester është më i qartë dhe më sulmues. Në një kundërsulm që pati francezin si protagonist në pasin e fundit, ekuadoriani Valencia gjuajti brenda zonës dhe shënoi. Arsenal rinis të sulmojë, por një tjetër aksion me 4 pasime i Manchester, nxjerr të vetëm para portierit Lingard, që dyfishon rezultatin. Londinezët nuk bien moralisht dhe portieri De Gea i “Djajve të kuq”, bëhet shpëtimtar në 3 raste.
Edhe në pjesën e dytë Arsenal vijon të sulmojë dhe Lakazete ngushton shifrat në 1-2 nga fare pranë. Manchester mbrohet dhe De Gea pret gjithçka, ndaj Ozil, Sanchez, Ramsey e Lakazete. Edhe një gjuajtje e Xhakës pas dy pritjeve radhazi të portierit spanjoll, kalon ngjitur me shtyllën. Por skuadra e Mourinhos kundërsulmon rrezikshëm dhe Pogba, pasi shmang Koscielni nga e djathta, nxjerr me portë bosh Lingard, që shënon golin e tretë për Manchester.
Fiton me përmbysje edhe Chelsea i Contes, që me 2 gola të Hazard dhe një të Morientes, fiton 3-1 ndaj Newcastle.
Tjetër fitore e “rëndë” e Liverpool, që kur është në ritëm, nuk përmbahet në lojë e rezultat. 1-5 fituan djemtë e Klopp në fushën e Brighton, duke gjetur brazilianët Coutinho dhe Firminho në superformë.
Ngec edhe këtë javë Totenham, që barazoi 1-1 në fushën e Watford. Në renditje, Manchester United afrohet në 5 pikë nga rivalët e City-t që luajnë të dielën. Me një pikë më pak renditet Chelsea, ndërsa Liverpool kapërcen Arsenalin dhe Totenham, e arrin vendin e katërt, me 3 pikë larg Chelsea-t. /tesheshi.com/
