Ukraina ndaloi 38 libra të publikuar në Rusi, duke argumentuar se ato shpërndajnë ideologji të urrejtjes dhe separatizëm.
“Lista e zezë” përfshin punime të nacionalistëve rusë, Alexander Dugin, Eduard Limonov dhe Sergei Glazyev e u publikua në televizionin shtetëror të Kievit. Në deklaratën shoqëruese akuzohej Rusia se ka ndërmarrë një luftë informative kundër Ukrainës.
Kështu, luftës në terren që pas aneksimit të Krimesë, vijon në krahinat lindore, Donjeck e Luhansk, i shtohet edhe lufta ideologjike mes dy vendeve. Lufta e informacionit, si e quajnë në Ukrainë, është sipas Kievit, pjesë e agresionit kundër qeverisë properëndimore të këtij vendi.
Nga ana e saj, edhe Rusia ka një “listë të zezë” librash dhe publikimesh të tjera, të quajtur Lista Federale e Materialeve Ekstremiste. Në të janë të përfshira mbi 1 mijë tituj mes të cilave publikime të grupeve ekstremiste, të Dëshmitarëve të Jehovait, libra të ish-spiunit rus, Alexander Litvinenko, që ndërroi jetë në Londër nga helmimi radioaktiv. /tesheshi.com/
