Shpërthen lufta brenda mazhorancës, madje nga rradhët e Partisë Socialiste.
E përditshmja “Shekulli”, që si botues ka deputetin socialist, Koço Kokëdhima, ka sulmuar ashpër ministrin e Brendshëm, Saimir Tahiri, pikërisht ditën kur Guardia Di Finanza publikoi raportin, ku në Shqipëri theksohet se ka rënë ndjeshëm kultivimi i drogës.
Në një shkrim të sajin “Shekulli”, thekson se Shqipëria ëhstë prodhuese e drogës që eksportohet në tregun e Lombardisë në Itali. Duke i vënë citimin e gazetës “Corriere della Sera”, “Shekulli” shkruan: “Corriere: Shqipëria prodhuese e drogës, Lombardia tregu i artë”.
Në fakt shkrimi i “Corriere della Sera” thekson se Lombardia është treg i rëndësishëm për trafikantët shqiptarë të heroinës, e cila nuk prodhohet në Shqipëri, por vjen nga Afganistani, Turqia, apo Irani.
Shkrimi i Corriere-s, bën të ditur se dy italianë janë arrestuar si bashkëpunëtorë të shqiptarëve në trafikun e mariuanës me avion, Giorgio Reformato i famshëm i avionit të Divjakës dhe një qytetar nga provinca e Varese-s.
Gazeta informon mbi rrugët e trafikut në përgjithësi dhe titulli është krejt i ndryshëm i asaj që “Shekulli” ka zgjedhur për kontekst.
Botuesi i “Shekullit”, Koço Kokëdhima prej kohësh është në përplasje me ministrin e Brendshëm Saimir Tahiri, i cili e ka cilësuar si të patolerueshme gjuhën e deputetit të qarkut të Vlorës, i cili thuajse çdo ditë kërkon legalizimin e hashashit për nevoja mjekësore.
Marrëdhënia e tyre e ftohtë dihej, por sulmi i sotëm tregon se gjërat janë të acaruara, dhe në rezonancë me një sulm tjetër nga e majta, siç është gazeta pro mazhorancës “Dita” në pronësi të djalit të një deputete tjetër të PS-së, Arta Dades.
Në raportin e saj vjetor, Guardia di Finanza italiane raporton se Shqipëria ka bërë përparime thelëbsore në luftën kundër kultivimit të drogës.
Sipas raportit të Agjencisë Monitoruese, gjatë vitit 2015, sipërfaqja e kultivuar me bimë narkotike është ulur me 10 herë krahasuar me vitin 2013. Në raport thuhet ndër të tjera se gjatë vitit 2013, policia e Shqipërisë shkatërronte 13 herë më pak bimë narkotike se sasia e raportuar nga monitorimi ajror. Kështu gjatë vitit 2013, janë raportuar nga monitorimi; 930 ton dhe janë shkatrruar 70 ton ose 7% e sasisë së raportuar nga monitorimet ajrore.
Këtë vit- thekson raporti i Guardia di Finanza- është kultivuar një sipërfaqe rreth 10 herë më e vogël dhe deri tani është shkatërruar rreth 96 % e sasisë së raportuar ndërkohë që operacionet vazhdojnë.
Raporti i Guardia di Finanza iu paraqit dje në takimin e ambasadorëve të BE-së dhe SHBA-së me ministrin e Brendshëm, Saimir Tahiri. /tesheshi.com/
