Uashingtoni e ka kategorizuar si “dhunë”, formën e zgjedhur nga opozita për të kundërshtuar zgjedhjen e Kryeprokurorit të përkohshëm, që tashmë është Arta Marku, pra Kryeprokurore. Në një deklaratë të Ambasadës Amerikane në Tiranë, pos dënimin të “dhunës”, kreu i akuzës Adriatik Llalla konsiderohet “i ikur” tashmë
.
Deklarata e Plotë:
“Ambasada e Shteteve të Bashkuara dënon me forcë dhunën që ndodhi në protestën e sotme në Tiranë.
Ne mbështesim të drejtën e qytetarëve për të protestuar paqësisht, por dëmtimi i pronës publike, hedhja e granatave tymuese në Parlament dhe dhuna nuk janë të pranueshme. Ne i bëjmë thirrje të gjitha partive që të tregojnë vetëpërmbajtje dhe të nxisin qetësi.
Populli shqiptar nuk duhet të habitet që politikanët e tyre po luftojnë njëri-tjetrin. Kjo do të thotë se reforma në drejtësi më në fund po zbatohet. Komisionet e Vetingut do të kenë së shpejti rezultatet e tyre të para. Prokurori i Përgjithshëm që refuzonte të ndiqte penalisht politikanë është i ikur. Së shpejti do të shohim krijimin e SPAK-ut dhe BKH-së, të cilat do hetojnë dhe ndjekin penalisht zyrtarë të korruptuar të nivelit të lartë. Qytetarët shqiptarë presin me padurim për drejtësi. Dhe politikanët kanë frikë”, thuhet në deklaratën e Ambasadës Amerikane në Tiranë, ose siç mund të përkthehet ndryshe, nga ambasadori Lu. /tesheshi.com/
