Është liruar pjesëtari serb i Forcës së Sigurisë së Kosovës, Milosh Shoshiç, i cili u arrestuar të premten nga autoritetet serbe në Konçul. Këtë e ka konfirmuar ministri i FSK-së, Rrustem Berisha.
“Sipas informacioneve e kanë liruar pjesëtarin serb të FSK-së”, ka thënë Berisha për “Kosovapress”.
Siaps tij arrestimi është bërë në bazë të deklaratës së zyrtarit serb Marko Gjuriç bërë ditë më parë.
“Nuk kemi informacione të sakta për çka është ndaluar. Por sipas të gjitha gjasave është vazhdimësi e asaj deklaratës që të gjithë pjesëtarët e FSK-së do të dënohen deri me 10 vjet burg. Ky është rasti i tretë që ka ndodhur ditëve të fundit, ata dy tjerët i kanë liruar pas dy orëve”, thotë Berisha.
Ai e vlerëson këtë veprim të autoriteteve serbe të dëmshëm për raportet mes dy vendeve, madje sipas tij, duhet kushtëzuar edhe dialogu deri në ndaljen e këtyre veprimeve.
“Në këtë formë largohen shumë gjëra dhe nuk e di edhe puna e çështjeve tjera që nuk janë pjesë e FSK-së, por edhe dialog në fund të fundit duhet të kushtëzohet me sjelljet e tyre. Nuk mundemi ne ta vazhdojmë dialogun e ata të bëjnë skenarë të natyrave të ndryshme”, thotë Berisha. /tesheshi.com/
