Kosova ka shënuar përparim për katër vende në listën e “Reporterëve pa kufij” (sivjet e 78-ta), krahasuar me vitin e kaluar dhe bën pjesë në mesin e shteteve me media pjesërisht të lira.
Megjithatë sipas raportit të fundit të kësaj orgaizate, mediat kosovare vuajnë nga ndërhyrjet e drejtpërdrejta dhe tërthorazi nga politika, presioni financiar dhe varësia nga pronarët. Gazetarët të cilët kritikojnë autoritetet kosovare shpesh akuzohen si tradhtarë ose “simpatizues të serbëve”.
“Reporterët pa kufij” kanë përkujtuar rastin kur kryeministri Haradinaj i quajti gazetarët të pashkollë në një vizitë që ia bëri ministrit Pal Lekaj në ditët e para të qeverisë së tij.
Ndërsa kujtojnë edhe rrahjen e dy gazetarëve hulumtues pasi me raportime kritikuan anëtarët e qeverisë dhe aleatët e tyre.
“Reporterët pa kufij” gjithashtu raportojnë për ndasitë etnike nëpër media në Kosovë, derisa ka thënë se qeverinë Haradinaj e ka vlerësuar si pak më të mirë sesa qeveritë e kaluara sa i përket marrëdhënieve me mediat.
Ndërsa Shqipëria ka shënuar ngritje për një pozitë. Nga vendi i 76-të sa ishte vitin e shkuar, tani ajo zë pozitën e 75-të në këtë listë.
Serbia më 2017 ishte në vendin e 66-të, ndërsa tani ka pësuar rënie për dhjetë vende duke u pozicionuar në të 76-ën pozitë.
Maqedonia sivjet është në pozitën e 109-të, duke shënuar ngritje për dy pozita në krahasim me vitin e shkuar. /tesheshi.com/
