Treshja sulmuese e Barcelonës, Messi, Suarez dhe Neymar, ka qenë shkatërruese për Romën, që ngriti flamurin e bardhë në “Camp Nou” brenda 45 minuta. Kështu, Barcelona përcjell festivalin e golave nga fundjava, me ç’rast kishte turpëruar Real Madrid-in, ndërkohë që radha qe për skuadrën italiane, e cila përjetoi ferrin blaugrana në ndeshjen e mbyllur me shifra tenistike, 6-1.
Për fatin e romanistëve, dueli tjetër ndërmjet Bate Borisov-it dhe Bayer Leverkusen-it përfundoi në barazim, 1-1. Si kryesuese e grupit E, Barcelona ka marrë vizën për në fazën tjetër të garës, ndërkohë Roma, Leverkusen-i dhe Bate Borisov-i do e kërkojnë kualifikimin në ndeshjet e fundit, pas dy javësh.
Arsenal-i, falë triumfit në shtëpi ndaj Dinamo Zagreb-it, në një ndeshje të përfunduar 3-0, i mban ende gjallë shpresat për një kualifikim të mundshëm, por duhet të mposhtë në javën e fundit skuadrën greke të Olimpiakosit, që doli e turpëruar nga “Alianz Arena”, pasi Bayern Mynih-u e mposhti me shifra të thella, 4-0.
Porto i ka komplikuar punën vetës, pasi në shtëpi u mposht 0-2 prej Dinamo Kiev-it. Kështu, portugezëve tani u mbetet ta përfundojnë detyrën në “Stamford Bridge”, në duelin përballë skuadrës londineze Chelsea, që shkëlqeu në udhëtim ndaj Maccabi Tel Aviv-it, duke fituar 0-4. Përveç izraelitëve, që i kanë përfunduar herët garat, në lojë janë tri skuadra, Chelsea, Porto dhe Dinamo Kiev-i, dhe gjithçka do vendoset në ndeshjet e fundit.
Zenit St. Petersburg-u i bën një dhuratë skuadrës belge Gent, ndërsa ka ndalur në shtëpi Valencia-n, duke fituar 2-0. Në duelin tjetër, belgët triumfuan në udhëtim ndaj Lyon-it, 1-2, për të rrëmbyer pozitën e dytë në renditje. /tesheshi.com/
