Nga Gani Gashi
Ekziston një shkollë e mesme rajonale në Kosovë e cila tashmë prej 25 vjetësh mësimet i zhvillon nëpër bodrume e objekte të tjera shkollore, por asnjëherë deri më tani në ndërtesën e re që ka nisur gjashtë vjet më parë, e që nuk ka përfunduar ende.
Edhe për këtë vit të ri shkollor, shpresa e nxënësve dhe arsimtarëve të shkollës së mesme të Mjekësisë ”Dr. Xheladin Deda”, në Mitrovicë, që të zhvillojnë mësim në godinën e shkollës së tyre, është shuar.
“Procesi mësimor në shkollën e mesme rajonale të mjekësisë në Mitrovicë, është zhvilluar në kushte shumë të rënda, e tërë kjo po ndodh për shkak të mungesës së objektit të kësaj shkolle, objekt i cili ka filluar të ndërtohet në vitin 2009, e ende nuk ka përfunduar”, tha drejtori i kësaj shkolle Gani Rama, për portalin “tesheshi.com”.
Rama është shprehur bukur i shqetësuar për kushte në të cilat do të zhvillohet mësimi, pasi që për shkak të mungesës së objektit në këtë shkollë nuk po munden të kryhen reformat arsimore.
“Kemi mbi 850 nxënës nga Mitrovica, Vushtrria e Skënderaj, të regjistruar në 11 drejtime, me 32 paralele, ndërsa mësimin e zhvillojmë në objektin e shkollës së mesme teknike në Mitrovicës, në orarin e pasdites”, ka thënë Rama.
Sipas tij, mësimi për nxënësit e Mjekësisë në Mitrovicë, edhe këtë vit të ri shkollor do të fillojë në orarin e pasdites, pra orët mësimore do të jenë vetëm nga 30 minuta, ndërsa nuk do të ketë thuajse pushime farë pushime në mes të orëve, por vetëm kohë sa të ndërrohen ditarët tek profesorët.
“Për momentin pushimi i gjatë për nxënësit do të jetë vetëm 10 minuta që nuk ka askund në botë, por jemi të detyruar që të bëjmë këtë shkurtim, pasi që shkolla është rajonale dhe nxënësit udhëtojnë edhe nga fshatra e rajonit”, arsyeton drejtori, vendimin për shkurtim të pushimit të gjatë.
Sipas tij, nëse nuk gjendet një zgjidhje, në dimër për shkak të udhëtimit të nxënësve do të jenë të detyruar që edhe këtë pushim ta heqin në mënyrë që nxënësit të munden të kapin oraret e udhëtimit që kanë nëpër fshatra të komunave përreth Mitrovicës.
“Përveç këtyre problemeve jemi të shqetësuar edhe për mësimdhënien dhe mësimnxënien tek nxënësit, pasi që ora e mësimit në këtë shkollë është vetëm 30 minuta, ndërsa shumica e klasave kanë nga 35-37 nxënës”, shton drejtori Rama.
“Kjo shkollë ka një traditë 68 vjeçare, kemi një staf akademik shumë të mirë prej 54 profesorëve, por që punojnë në kushte shumë të renda”, shton ai.
Sipas drejtorit të shkollës së Mjekësisë, nëse mësimet do të zhvilloheshin në ndërtesën e shkollës, do të kishte orë mësimi 45 minuta dhe punë në dy turne, mësimdhënia dhe mësim nxënia do të ishte në nivelin më të mirë.
“Objekti i ri shkollor që ka filluar të ndërtohet në vitin 2009, në afërsi të Spitalit të qytetit, në lagjen “Bair”, asesi nuk po kryhet edhe pse tani nuk ka ngelur shumë për të bërë”, thotë drejtori i shkollës së Mjekësisë.
“Si drejtor i shkollës nuk kam asnjë informacion se çfarë është duke ndodhur me këtë objekt shkollor, kur kanë filluar punimet, na kanë thënë se në vitin 2012, objekti i ri shkollor do të lëshohet në përdorim, por si duket as këtë vit nuk do të kryhen punimet”, ka thënë Rama.
Ai thotë se edhe Drejtoria komunale e Arsimit në Mitrovicës, nuk ka asnjë informacion, se kur do të përfundojnë ndërtimi i objektit, pasiqë investitor është ministria e Arsimit.
“Shpesh kaloj andejpari me qëllim që vetëm të shoh se a është kush duke punuar në të apo jo, kohëve të fundit po shoh se diçka po punohet dhe shpresoj shumë se gjashtëmujorin e ardhshëm pra në vitin 2016, objekti të kryhet dhe të fillojmë mësimin në objektin e ri”, shpreson drejtori.
Nga ana tjetër, përfaqësuesi i kompanisë “Ferda”, që është kontraktuar nga ministria e Arsimit për ndërtimin e objektit shkollor, Albert Zeneli, lidhur me problemin e zvarritjes së punimeve ka drejtuar gishtin nga Ministria e Arsimit.
Ai thotë se problemi pse punimet janë zvarritur deri më tani qëndron në pagesat e ministrisë së Arsimit, e meqënëse nuk po lëvrohen paratë, kompania ka qenë e detyruar të ndërpresë punimet.
“Kostoja e ndërtimit të kësaj shkolle është 2 milion euro dhe ka disa të tilla në Kosovë, pra që kanë filluar të ndërtohen në vitin 2009, janë 10 shkolla dhe asnjëra deri më tani nuk ka përfunduar së ndërtuar”, ka thënë pronari i kompanisë “Ferda”.
“Ministria e Arsimit nuk ka para dhe për këtë arsye janë zvarritur punimet”, ka thënë Zeneli, duke theksuar se për momentin është duke u punuar në brendësi të objektit ku ka mbetur edhe shumë pak punë për të përfunduar. /tesheshi.com/
