Albin Kurti i ka kujtuar SHBA-së se zgjedhjet në veri janë njohur prej saj, ato në cilët kanë fituar kandidatët shqiptarë, të cilët tani duhet të vijojnë detyrën.
“Të gjitha trupat ndërkombëtare e njohën rezultatin e zgjedhjeve. Posa të njohësh këtë rezultat, atëherë kryetarët duhet të shkojnë në objektet e komunave. Kush tjetër duhet të shkojë në këto objekte, nëse jo kryetarët?”, ka pyetur Kurti në mënyrë sfiduese, pak pasi amerikanët shfaqën zemërim ndaj tij me anë të ambasadorit të tyre në Kosovës. Si pasojë, SHBA anulluan stërvitjen e NATO-s “Defender Europe 2023” në territorin e Kosovës, si masë të parë ndëshkuese.
Në një intervistë për CNN, Kurti është rrekur t’u tregojë amerikanëve se ç’kërkon Serbia prej tyre, diçka që sipas tij nuk duhet lejuar.
“Kemi një komunitet serb në Kosovë, që është 5 përqind e popullsisë. Ne duam të jetojmë në një shoqëri multikulturore, por s’duam të kemi një minoritet të privilegjuar, sepse Beogradi do kompensim për bombardimin nga NATO-ja në kohën e Millshoeviçit”, arsyetoi Kurti, duke vijuar të tregojë se kush e nxit dhunën në veri.
“Ne kemi shumë video dhe foto që shfaqin milicinë serbe duke qenë pjesë e bandave të dhunshme. Disa nga ta vijnë nga Kosova, por disa edhe nga Serbia. Serbia fqinje është autokraci pro-ruse.
Ata kanë urdhëruar këtë të ashtuquajtur xhandarmëri, për të shkaktuar trazira në Kosovë”, ka vijuar Kurti.
Më herët, ai tha në një deklaratë se “Demokracia nuk mund të suspendohet e as të mbahet peng. Ushtrimi i saj është garant i paqes dhe sigurisë, assesi kërcënim apo rrezikim”. /tesheshi.com/
