Ajo është ndër godinat më simbol të Tiranës, lënë si trashëgimi e vyer nga italianët, për ironi fashizmi. Korpusi universitar vijon të jetë i tillë dhe sot, cenuar në lartësinë e saj kulmore në fund të bulevardit po italian “Dëshmorët e Kombit” nga godina të tjera përgjatë tij, më të larta.
Arkivi Shtetëror kujton ditën kur qeveria komunuste vendosi themelimin aty të Universitetit Shtetëror me gjashtë fakultetet e para.
“Si sot, më 30 maj 1957, Këshilli i Ministrave aprovoi projektdekretin mbi ‘krijimin e Universitetit Shtetëror të Tiranës’.
Në mbledhjen e kësaj date, qeveria vendosi emërimin e Zija Këlliçit si rektor të USHT-së, të Kolë Paparistos si zëvendësrektor për anën shkencore dhe të Hasan Dumës si zëvendësrektor për anën mësimore. Ky vendim do të hynte në fuqi më 1 qershor.
Sipas projektdekretit, USHT-së do të përbëhej nga 6 fakuletet e poshtëlistuara:
1) Fakulteti i Histori-Filologjisë;
2) Fakulteti Juridik;
3) Fakulteti Ekonomik;
4) Fakulteti i Inxhinierisë;
5) Fakulteti i Shkencave të Natyrës;
6) Fakulteti i Mjekësisë.
Vendimi përcaktonte që më 1 qershor USHT-së t’i kalonin kuadrot dhe mjetet materiale e financiare”. /tesheshi.com/
